അമിതവണ്ണം പ്രശ്നമാകുന്നുണ്ടോ?

അമിത ഭക്ഷണനിയന്ത്രണം അപകടമാണ്. ആഹാരക്രമത്തിൽ പെട്ടെന്നു വരുത്തുന്ന മാറ്റങ്ങൾ പലപ്പോഴും ഫലപ്രദമാകണമെന്നില്ല-പൊണ്ണത്തടി മാറ്റാൻ ശ്രദ്ധിക്കേണ്ടത്

അമിതവണ്ണം ഏറ്റവും വലിയ ആരോഗ്യ പ്രശ്നങ്ങളിലൊന്നാണ്. അമിതവണ്ണത്തിന്റെ കാരണങ്ങളിൽ ഏറ്റവും പ്രധാനം ശരീരത്തിന് ആവശ്യമുള്ളതിലും അധികം ഭക്ഷണം കഴിക്കു ന്നതാണ്. അധിക ഭക്ഷണം കൊഴുപ്പായി ശരീര കോശങ്ങളിൽ അടിഞ്ഞുകൂടുന്നു. പൊണ്ണത്തടി യുള്ളവർക്ക് പ്രമേഹം, രക്താതിസമ്മർദ്ദം, കരൾ രോഗങ്ങൾ എന്നിവ ഉണ്ടാകാനുള്ള സാധ്യത വളരെ കൂടുതലാണ്. പുരുഷന്മാരിൽ കൂടുതലും ശരീരത്തിന്റെ മധ്യഭാഗത്ത് വണ്ണം കൂടുന്ന അവസ്ഥയാണുണ്ടാകുന്നത്. സ്ത്രീകളിൽ അരക്കെട്ടിലും തുടയിലുമാണ് കൊഴുപ്പ് അടിയുന്നത്.

കുടവയറിന് പാരമ്പര്യവും ഒരു പരിധിവരെ കാരണമാകുന്നുണ്ട്. സ്ത്രീകളിൽ ആർത്തവവിരാമത്തിന് ശേഷമുണ്ടാകുന്ന ഹോർമോൺ വ്യതിയാനങ്ങളും വയറിലെയും അരക്കെട്ടിലെയും കൊഴുപ്പു കൂട്ടും. ശരീരത്തിലെ ഗ്രന്ഥികളായ പിറ്റ്യൂറ്ററിയുടെയും തൈറോയിഡിന്റെയും പ്രവർത്തനം ശരിയായ രീതിയിൽ നടക്കാതെ വരുന്നതും ചിലരിൽ അമിതവണ്ണം ഉണ്ടാകാറുണ്ട്. ഭൂരിഭാഗം സ്ത്രീകളിലും പ്രസവശേഷവും ഗർഭാശയവും അണ്ഡാശയവും നീക്കം ചെയ്തതിനു ശേഷവും വണ്ണം വയ്ക്കുന്നുണ്ട്. ഇതിനു കാരണം സ്ത്രീ ഹോർമോണുകളിൽ വരുന്ന വ്യതിയാനമാണ്.

പൊണ്ണത്തടിയൻമാർ കൂടുന്നു

അഞ്ചിനും പതിനാറിനും ഇടയിലുള്ള കുട്ടികളിൽ പൊണ്ണത്തടി വർദ്ധിക്കുന്നതായി പഠനങ്ങൾ പറയുന്നു. മാതാപിതാക്കളിൽ ഒരാൾക്ക് പൊണ്ണത്തടിയുണ്ടെങ്കിൽ കുട്ടിക്ക് അമിതഭാരമുണ്ടാകാനുള്ള സാധ്യത 50 ശതമാനമാണ്. രണ്ടു പേർക്കും പൊണ്ണത്തടിയുണ്ടെങ്കിൽ സാധ്യത 80 ശതമാനമായി വർദ്ധിക്കും. പ്രമേഹവും ഹൃദ്രോഗവും മാത്രമല്ല, അപകർഷതാബോധവും വിഷാദരോഗവും പൊണ്ണത്തടിയുള്ളവരെ ബാധിക്കും.

ശരീരത്തിന്റെ പ്രവർത്തനത്തിന് ഊർജ്ജം ആവശ്യമാണ്. ഈ ഊർജ്ജം ലഭിക്കുന്നത് ഭക്ഷണത്തിലൂടെയാണ്. ശരീരം അമിതമായി സ്വീകരിക്കുന്ന ഊർജ്ജം കൊഴുപ്പായി ശേഖരിക്കുന്നു. അതിനാൽ, ഒരാളുടെ തൂക്കത്തിനും ഉയരത്തിനും പ്രായത്തിനും അനുസരിച്ച് ഊർജ്ജം കുറവുള്ള ഭക്ഷണക്രമമാണ് സ്വീകരിക്കേണ്ടത്.