ഒന്നും ഒന്നും വല്യ ഒന്ന്

കലാഭവൻ ഷാജോണിന്റെ പുതിയ അപാർട്മെന്റ് വിശേഷങ്ങൾ... രണ്ട് ഫ്ലാറ്റ് കൂട്ടിച്ചേർത്ത് ഒന്നാക്കിയപ്പോൾ...

- സുനിത നായർ

എട്ട് വർഷങ്ങൾക്കു മുൻപാണ് ഇവിടെ ആദ്യമെത്തിയത്. ഇപ്പോൾ വീണ്ടും വന്നപ്പോൾ അപാർട്മെന്റിന് പുറമേക്ക് ഒരു മാറ്റവും ഇല്ല. നേരെ പതിമൂന്നാം നിലയിലേക്ക് വാതിൽ തുറന്നപ്പോൾ കണ്ടതാകട്ടെ, അന്നു കണ്ട കാഴ്ചകളൊന്നുമല്ല. 

പറഞ്ഞു വരുന്നത് നമ്മുടെയെല്ലാം പ്രിയ നടൻ കലാഭവൻ ഷാജോണിന്റെ കൊച്ചി കലൂരിലെ അപാർട്മെന്റ് വിശേഷങ്ങളാണ്. ഒറ്റപ്പാലത്ത് ഷൂട്ടിനു പോകാനൊരുങ്ങിയ ആളെ പിടിച്ചുനിർത്തിയാണ് അന്ന് വീട്ടുവിശേഷങ്ങൾ സംഘടിപ്പിച്ചത്. ഷൂട്ട് കഴിഞെത്തി വിശ്രമിക്കാനൊരുങ്ങിയ കക്ഷിയെ വിളിച്ചുണർത്തിയാണ് ഇത്തവണ വീട്ടുവിശേഷങ്ങളിലേക്ക് കടന്നത്. തിരക്കാണെങ്കിലും ക്ഷീണമുണ്ടെങ്കിലും ഷാജോണിന്റെ മുഖത്തെ ചിരിക്ക് അന്നും ഇന്നും ഒരു മാറ്റവുമില്ല.

അന്നത്തെ മൂന്നാം ക്ലാസ്സുകാരിയും എൽകെ ജിക്കാരനും പന്ത്രണ്ടിലും എട്ടിലുമായി. മക്കൾ വലുതായപ്പോൾ വീടിനും അൽപം കൂടി വലുപ്പമാവാം എന്ന തോന്നലിലാണ് തൊട്ടപ്പുറത്തെ ഫ്ലാറ്റ് കൂടി വാങ്ങി കൂട്ടിച്ചേർത്ത് വീട് വിശാലമാക്കിയത്. മൂന്ന് വർഷമായി തൊട്ടടുത്ത ഫ്ലാറ്റ് കൂടി വാങ്ങിയിട്ട്. ഇപ്പോഴാണ് പക്ഷേ, പണിയാനുള്ള സാഹചര്യം ഒത്തുവന്നത്.

ഭാര്യ ഡിനിക്കും മക്കൾ ഹന്നയ്ക്കും യോഹനും പുതിയ ഇന്റീരിയറിനെക്കുറിച്ച് കൃത്യമായ ധാരണകളുണ്ടായിരുന്നു. എല്ലാവരും കൂടി ചേർന്നാണ് വീടിന്റെ മുഖം മിനുക്കിയെടുത്തത്. പഴയ ഫ്ലാറ്റിന്റെ ഇന്റീരിയർ ഒരുക്കിയ ഡിലൈഫിനെത്തന്നെ ഇത്തവണയും ഏൽപിച്ചു. ഡിലൈഫിന്റെ സേവനത്തിൽ പൂർണ തൃപ്തരാണ് ഷാജോണും കുടുംബവും. അതിനാൽ രണ്ടാമതൊന്ന് ആലോചിക്കേണ്ടി വന്നില്ല.