ഗ്ലാസ് Safe ആണ്; secure അല്ല

ഗ്ലാസ് വീടിന്റെ ഡിസൈൻ മൂല്യം മാറ്റുകൂട്ടും, എന്നാൽ ചെറിയ കുട്ടികളുള്ള വീടുകളിൽ അപകട കാരണമാകുമോ? ചൂട് കൂട്ടുമോ?

- ശ്രീദേവി

പുതിയ വീടുകളുടെ ഡിസൈനിൽ ഗ്ലാസിന് പ്രധാനപ്പെട്ട റോൾ കിട്ടാറുണ്ട്. ജനൽ മുതൽ കബോർഡുകളുടെ വാതിലിനു പോലും ഗ്ലാസ് ഉപയോഗിക്കുന്നതാണ് പുതിയ ട്രെൻഡ്. എക്സ്റ്റീരിയർ ഭിത്തികളുടെ ഭാഗമായി ഗ്ലാസ് ഉപയോഗിക്കുന്നത് സുരക്ഷിതമാണോ? ഗ്ലാസ് കൊണ്ടുള്ള മേൽക്കൂര വെയിലേറ്റാൽ പൊട്ടുമോ? ഗ്ലാസ് നമ്മുടെ കാലാവസ്ഥയ്ക്കു യോജിക്കുമോ? തുടങ്ങിയ ഒട്ടേറെ സംശയങ്ങൾ വീടുവയ്ക്കുന്നവർക്ക് ഉണ്ടാകാറുണ്ട്. ഗ്ലാസ് പൊട്ടിയുണ്ടാകുന്ന അപകടങ്ങൾ പത്രത്തിലും സമൂഹമാധ്യമങ്ങളിലും കാണുമ്പോഴുള്ള ആശങ്കകൾ വേറെ, അത്തരം സംശയങ്ങൾക്കുള്ള മറുപടികളാണ് വരും പേജുകളിൽ

താരത്തിളക്കം

 മോഡേൺ, മിനിമലിസ്റ്റിക്, കന്റെംപ്രറി ശൈലി വീടുകളിലെല്ലാം ഗ്ലാസ് ധാരാളം ഉപയോഗിക്കുന്നു. കാണാനുള്ള ഭംഗി മാത്രമല്ല; പുതിയ കാലത്തിന്റെ, ജീവിതരീതിയുടെ പ്രത്യേകതകൾ കൂടി ഗ്ലാസിന്റെ ഉപയോഗത്തിനു പിന്നിലുണ്ട്. ഗ്രാമത്തിലും നഗരത്തിലും ഗ്ലാസ് ഉപയോഗിക്കുന്നതിനു കാരണം വ്യത്യസ്തമാണെന്ന് ആർക്കിടെക്ടുമാർ പറയുന്നു. തിരക്കേറിയ നഗരങ്ങളിൽ ചെറിയ പ്ലോട്ടിലായിരിക്കും വീടുകൾ നിർമിക്കേണ്ടിവരിക. ചെറിയ ലാൻഡ്സ്കേപ്പിലെ പച്ചപ്പ് ഗ്ലാസിലൂടെ കാണാൻ സാധിക്കുകയാണെങ്കിൽ അത് ആശ്വാസമല്ലേ? നഗരത്തിൽ സ്വന്തം മുറ്റത്തിനപ്പുറമുള്ള ഒഴിഞ്ഞ പറമ്പ് പോലും വിശാലത തോന്നിക്കാൻ സഹായിക്കും. എന്നാൽ പുറം കാഴ്ചകൾ എന്താണെന്ന് അറിഞ്ഞുവേണം ഗ്ലാസ് കൊടുക്കാൻ. വെറും കോൺക്രീറ്റ് കെട്ടിടങ്ങളോ അനാകർഷകമായ കാഴ്ചകളോ ഉള്ളയിടത്ത് ഗ്ലാസ് വേണ്ട. ഗ്രാമങ്ങളിൽ അല്ലെങ്കിൽ വലിയ പ്ലോട്ടുകളിൽ കാഴ്ചകൾക്കുള്ള പ്രാധാന്യം പോലെത്തന്നെ ലക്ഷ്വറി ഫീൽ കൊടുക്കാനും ഗ്ലാസ് ഉപയോഗിക്കാറുണ്ട്.

സുരക്ഷിതമാണോ?
നോക്കിയും കണ്ടും സ്ഥാപിച്ചില്ലെങ്കിൽ ഗ്ലാസ് പാരയാകാം

ഗ്ലാസ് സുരക്ഷിതമാണ് എന്നാൽ സംരക്ഷണത്തിന് പര്യാപ്തമല്ല എന്നാണ് ഈ രംഗത്തെ വിദഗ്ധരുടെ അഭിപ്രായം. ടഫൻഡ് ഗ്ലാസ് അല്ലെങ്കിൽ ടെംപേർഡ് ഗ്ലാസ്, ലാമിനേറ്റഡ് ഗ്ലാസ് എന്നിങ്ങനെ തീവ്രമായ കാലാവസ്ഥയെയും പ്രഹരങ്ങളെയും അതിജീവിക്കുന്ന ഉൽപന്നങ്ങളാണ് വീടുകളിലും വാണിജ്യസ്ഥാപനങ്ങളിലുമൊക്കെ കൂടുതലായി ഉപയോഗിക്കുന്നത്. ഉയർന്ന താപത്തിലേക്ക് ചൂടാക്കി പെട്ടെന്നു തന്നെ തണുപ്പിച്ചെടുക്കുന്ന പ്രക്രിയയിലൂടെയാണ് ടഫൻഡ് ഗ്ലാസ് നിർമിക്കുന്നത്.