ടാറ്റ മാറുന്നു കുതിക്കാൻ, ഓഹരികളിൽ അവസരം

5 വർഷം കൊണ്ട് 90 ബില്യൺ ഡോളറിന്റെ (73.79 ലക്ഷം കോടി രൂപ നിക്ഷേപ പദ്ധതികൾക്ക് ഒരുങ്ങുകയാണു ടാറ്റ ഗ്രൂപ്പ്. നീണ്ട 19 വർഷത്തെ ഇടവേളയ്ക്കുശേഷം ടാറ്റ ഗ്രൂപ്പിൽ നിന്നു മൂന്നു കമ്പനികൾ ഓഹരിവിപണിയിലേക്ക് എത്തുന്നു. അതിൽ ടാറ്റ മോട്ടോഴ്സിന്റെ ഉപകമ്പനിയായ ടാറ്റ ടെക്നോളജീസിന്റെ ഐപിഒ ഉടനുണ്ടാകും. ടാറ്റ ഗ്രൂപ്പിനു നിലവിൽ 29 ലിറ്റഡ് കമ്പനികളാണുള്ളത്. ലയനങ്ങളിലൂടെ ലിസ്റ്റഡ് കമ്പനികളുടെ എണ്ണം പകുതിയാക്കാനുള്ള നടപടികൾ അതിവേഗം മുന്നേറുകയാണ്.

ഓഹരിയിൽ ദീർഘകാല നിക്ഷേപത്തിലൂടെ നേട്ടമുണ്ടാക്കിയവരെല്ലാം മികച്ച കമ്പനികളുടെ ഓഹരികൾ വാങ്ങിയവരാവും. വർഷങ്ങളോളം മികച്ച രീതിയിൽ കൊണ്ടുപോകുന്ന ബിസിനസ് ഗ്രൂപ്പുകൾ സ്വയം വളരുക മാത്രമല്ല, ആ വളർച്ചയിൽ നിക്ഷേപകരെയും ഒപ്പം കൂട്ടുകയാണ്. അതിന് ഇന്ത്യയിലെ ഏറ്റവും മികച്ച ഉദാഹരണം - ആണ് 155 വർഷത്തെ ചരിത്രമുള്ള ടാറ്റ ഗ്രൂപ്പും അതിലെ കമ്പനികളും

 ഉപ്പു തൊട്ട്...

ഉപ്പു തൊട്ട് സോഫ്റ്റ്വെയർ വരെ, മൊട്ടുസൂചി മുതൽ ഹെലികോപ്റ്റർ വരെ ടാറ്റയെക്കുറിച്ച് നാംഅപ്പോഴും കേൾക്കുന്ന വിശേഷണമാണിത്. ടാറ്റ ഗ്രൂപ്പ് കൈവയ്ക്കാത്ത മേഖല തന്നെ വിരളമാണ്. നൂറോളം കമ്പനികളും നൂറിലധികം രാജ്യങ്ങളിൽ സാന്നിധ്യവും. 29 കമ്പനികളാണ് നിലവിൽ ടാറ്റ ഗ്രൂപ്പിൽ നിന്നു ലിസ്റ്റ് ചെയ്തിരിക്കുന്നത്. ഈ ലിസ്റ്റഡ് കമ്പനികളുടെ എണ്ണം ലയനങ്ങളിലൂടെ പകുതിയായി കുറയ്ക്കാനുള്ള ഒരുക്കത്തിലാണ് ടാറ്റ ഗ്രൂപ്പ്. 2017ൽ ടാറ്റ സൺസ് ചെയർമാനായി എൻ.ചന്ദ്രശേഖരൻ എത്തുമ്പോൾ രണ്ടു ലക്ഷ്യങ്ങളാണ് ഉണ്ടായിരുന്നത്. 1.ടാറ്റയുടെ വിപണിമൂല്യം ഉയർത്തുക 2. ഗ്രൂപ്പിന്റെ ബിസിനസുകൾ പുനഃക്രമീകരിക്കുക. ഒരേ മേഖലയിലുള്ള കമ്പനികൾ ലയിപ്പിക്കുക വഴി ടാറ്റയ്ക്ക് മികച്ച മത്സരം കാഴ്ചവയ്ക്കാനാവും.

26.4 ബില്യൺ ഡോളർ ബ്രാൻഡ് വാല്യൂ, ഇന്ത്യയിലെ നമ്പർ വൺ