വിഡിയോ കോൺഫറൻസിങ്ങിൽ വിപ്ലവം സൃഷ്ടിച്ച് ടെക്‌ജെൻഷ്യ

ഏതു ഭാഷയിൽ സംസാരിച്ചാലും സ്വന്തം ഭാഷയിൽ കേൾക്കാൻ കഴിയുന്ന വിഡിയോ കോൺഫറൻസിങ് സംവിധാനവുമായി ആഗോളതലത്തിലേക്കു വളരാൻ തയാറെടുക്കുകയാണ് ജോയ് സെബാസ്റ്റ്യനും സംഘവും.

നാലു വർഷത്തിനിടയിൽ ടെക്നോളജി രംഗത്ത് കേന്ദ്രസർക്കാരിന്റെ രണ്ടു പുരസ്കാരങ്ങളാണ് ടെൻഷ്യയെ തേടിയെത്തിയത്. 2020ൽ പുരസ്കാരം നേടിയ വി കൺസോൾ എന്ന വിഡിയോ കോൺഫറൻസിങ് സംവിധാനം കേന്ദ്രസർക്കാർ മുതൽ രാജ്യത്തെ വിവിധ ഹൈക്കോടതികളും സൈന്യവും വരെ ഇന്ന് ഉപയോഗിക്കുന്നു. 2023ൽ ഐടി മന്ത്രാലയം നടത്തിയ ഭാഷിണി ഗ്രാൻഡ് ഇന്നൊവേഷൻ ചലഞ്ചിൽ, രാജ്യത്തെ പല ഭാഷകളിൽ ലൈവ് ട്രാൻസ്ലേഷൻ സാധ്യമാവുന്ന സ്പീക്കർ പോഡിയം എന്ന ആപ്ലിക്കേഷൻ ടെക്ൻഷ്യയെ വീണ്ടും രാജ്യത്ത് ഒന്നാം സ്ഥാനത്തെത്തിച്ചു. പുരസ്കാരത്തിളക്കത്തിൽ ടെൻഷ്യയെയും അതിന്റെ സാരഥി ജോയ് സെബാസ്റ്റ്യനെയും കേരളം വീണ്ടും ആഘോഷിച്ചു. ലോകം ഗ്ലോബൽ വില്ലേജായി മാറുന്ന ഇന്നത്തെക്കാലത്ത് ഒരു ഭാഷയിൽ സംസാരിക്കുമ്പോൾ തത്സമയം മറ്റൊരു ഭാഷയിലേക്കു തർജമ ചെയ്യുന്ന സംവിധാനത്തിന് ആവശ്യക്കാർ ഏറെയാണ്.

"ചേർത്തല ഇൻഫോപാർക്ക് ആസ്ഥാനമായി വിഡിയോ കോൺഫറൻസിങ്ങിൽ സ്പെഷ്യലൈസ് ചെയ്യുന്ന കമ്പനിയാണ് ഞങ്ങളുടേത്. മൂന്നു രീതിയിൽ ഉപയോഗിക്കാവുന്ന സംവിധാനമാണ് ഭാഷിണി ചലഞ്ചിനു വേണ്ടി തയാറാക്കിയത്, ' ജോയ് സെബാസ്റ്റ്യൻ പറഞ്ഞു തുടങ്ങി: “രണ്ടു പേരും രണ്ടു ഭാഷയിലാണ് സംസാരിക്കുന്നതെങ്കിൽ ഇടയ്ക്ക് ഒരു ദ്വിഭാഷി വേണ്ടിവരും. അതിനു പകരം ഒരു സോഫ്റ്റ്വെയർ വികസിപ്പിച്ചു. ആയിരക്കണക്കിനു പേർ പങ്കെടുക്കുന്ന വെബിനാറുകൾ ഉണ്ടല്ലോ. പങ്കെടുക്കുന്ന വ്യക്തിക്ക് ഇഷ്ടമുള്ള ഭാഷയിൽ സംസാരിക്കുന്ന ആളുകളെ കേൾക്കാൻ സാധിക്കും. ഇപ്പോൾ പ്രധാനമന്ത്രിക്ക് എക്സിൽ മലയാളത്തിൽ ഉൾപ്പെടെ ഹാൻഡിൽസ് ഉണ്ട്. മലയാളം, തമിഴ് ഭാഷകളിലൊക്കെ അദ്ദേഹത്തിന്റെ വിഡിയോ വരുന്നു. അത്തരം കാര്യങ്ങൾ സാധ്യമാക്കുന്നതാണ് മറ്റൊന്ന്. മത്സരത്തിന് സബ്മിറ്റ് ചെയ്തിരുന്നത് വിഡിയോ കോൺഫറൻസിങ് മാത്രമാണ്. ഈ സംവിധാനങ്ങളൊക്കെ വി കൺസോളിൽ ഇന്റഗ്രേറ്റ് ചെയ്യുകയായിരുന്നു. നിലവിൽ ഈ ടൂളുകൾ കൊമേഴ്സ്യലായി കൊടുക്കാൻ തുടങ്ങിയിട്ടില്ല.

വി-കൺസോൾ വളരുന്നു