ക്രെഡിറ്റ് സ്കോർ: നിങ്ങളുടെ ഭാവി തീരുമാനിക്കും ഈ മൂന്നക്ക സംഖ്യ

ആറുമാസം കൂടുമ്പോൾ നടത്തുന്ന ബോഡി സ്കോറും ചെക്ക് പോലെ ക്രെഡിറ്റ് പരിശോധിക്കേണ്ടത് ഇന്ന് അനിവാര്യമാണ്.

- credit score

കുറയുന്ന ക്രെഡിറ്റ് സ്കോർ നിങ്ങളുടെ സാമ്പത്തികാവശ്യങ്ങളെയും അതുവഴി ഭാവിജീവിതത്തെയും പ്രതികൂലമായി ബാധിച്ചേക്കും. ബാങ്കുകളും മറ്റു ധനകാര്യ സ്ഥാപനങ്ങളും നിങ്ങൾക്കു വായ്പ നൽകണോ, വേണ്ടയോ എന്നു തീരുമാനിക്കുന്നത് ഈ സ്കോറിനെ അടിസ്ഥാനമാക്കിയാണ്. വായ്പകളുടെ പലിശപോലും ഈ സ്കോർ നോക്കിയാവും നിശ്ചയിക്കുക. ആരോഗ്യ പരിപാലനത്തിനു നടത്തുന്ന ബോഡി ചെക്കപ്പ് പോലെ ക്രെഡിറ്റ് സ്കോറും പരിശോധിക്കേണ്ട കാലമാണിത്.

ടെസ്റ്റ് റിപ്പോർട്ടും സ്കോറും

മൂന്ന് അക്കങ്ങൾ കൊണ്ടു നിങ്ങളുടെ സാമ്പത്തിക ഇടപാടുകൾ, അവയുടെ ചരിത്രം എന്നിവ കൃത്യമായി വരച്ചിടുന്നു എന്നിടത്താണ് ക്രഡിറ്റ് സ്കോറിന്റെ പ്രസക്തി.

നിങ്ങളുടെ ബാങ്കിങ് ചരിത്രം പരിശോധിച്ച് ടെസ്റ്റ് റിപ്പോർട്ടു തയാറാക്കി സ്കോർ നിശ്ചയിക്കാൻ നിലവിൽ നാലു സ്ഥാപനങ്ങളാണുള്ളത്. CIBIL (Credit Information Bureau India Limited), EQUIFAX, EXPERIAN, CRIF HIGH MARK എന്നിവയാണ് ഈ നാലു ക്രഡിറ്റ് ഇൻഫർമേഷൻ കമ്പനികൾ. 300മുതൽ 900വരെയുള്ള 3 അക്കങ്ങളിലൂടെയാണ് നിങ്ങളുടെ സ്കോർ വ്യക്തമാക്കുന്നത്.

സാധാരണ ആരോഗ്യപരിശോധനയ്ക്കിടെ നടത്തുന്ന ലാബ്സിന്റെ റിപ്പോർട്ടു കിട്ടുമ്പോൾ കണ്ണുടക്കുന്ന രണ്ടു കാര്യങ്ങളുണ്ട്.

ഓരോന്നിനും ആകാവുന്ന അനുപാതമാണ് ആദ്യത്തേത്. രണ്ടാമത്തേത് പരിശോധനയുടെ സാമ്പിളിൽ ലഭ്യമായ നിങ്ങളുടെ സ്കോറും. ആകാവുന്ന അനുപാതത്തിലും കൂടുതലാണ് നിങ്ങളുടെ സ്കോർ എങ്കിൽ മരുന്നോ വ്യായാമമോ ഒക്കെയായി കർശന മുൻകരുതൽ വേണ്ടിവരും. അതുപോലെയാണ് ക്രെഡിറ്റ് സ്കോറിന്റെ കാര്യവും.