ബജറ്റ് 2024 നിങ്ങൾക്ക് എന്തു കിട്ടും?

റിയൽ എസ്റ്റേറ്റ്, സ്വർണം, ഓഹരി, മ്യൂച്വൽഫണ്ട്, എന്നിവയടക്കമുള്ള എല്ലാത്തരം ആസ്തികളിൽ നിന്നും നിങ്ങൾക്കു ലഭിക്കുന്ന ലാഭത്തിന്മേൽ അധിക നികുതി നൽകേണ്ടിവരും.

ഏറെ ആനുകൂല്യങ്ങളും വമ്പൻ ജനക്ഷേമ പദ്ധതികളും ഉണ്ടാകുമെന്ന പ്രതീക്ഷകളെ തകർത്തുകൊണ്ടാണ് ധനമന്ത്രി നിർമല സീതാരാമൻ മൂന്നാം മോദി സർക്കാരിന്റെ ആദ്യ ബജറ്റ് അവതരിപ്പിച്ചത്. പക്ഷേ, തൊഴിൽ വർധിപ്പിക്കാനും കാർഷികരംഗത്തു മുന്നേറ്റമുണ്ടാക്കാനും ചെറുകിട സംരംഭകരെ സഹായിക്കാനും പദ്ധതികളുണ്ട്. വൻതുക മാറ്റിവച്ചിട്ടുമുണ്ട് എന്നത് എടുത്തുപറയേണ്ടതാണ്. ഇത് ഉപയോഗപ്പെടുത്തിയാൽ തൊഴിൽ നേടാനും വരുമാനം വർധിപ്പിക്കാനും ഒട്ടേറെ അവസരങ്ങൾ ലഭിക്കുമെന്നു പ്രതീക്ഷിക്കാം. പക്ഷേ, കിട്ടുന്നതിൽ മിച്ചം പിടിക്കാനും നിക്ഷേപിച്ച് വരുമാനം നേടാനും ഇടത്തരക്കാരെ നിർബന്ധിതരാക്കുന്ന പഴയ ആദായനികുതി സ്ലാബ് ഒഴിവാക്കാനുള്ള പ്രേരണയാണ് സർക്കാർ മുന്നോട്ടു വയ്ക്കുന്നത്.

അതേ സമയം പരമാവധി ചെലവിടാൻ പ്രേരിപ്പിച്ചുകൊണ്ട് പുതിയ സ്ലാബിന് ആനുകൂല്യങ്ങളും ഇളവുകളും പ്രഖ്യാപിച്ചിട്ടുമുണ്ട്. വിവിധ തരം ആസ്തികളിൽ നിക്ഷേപിച്ചാൽ കിട്ടുന്ന ലാഭത്തിൽനിന്ന് കൂടുതൽ തുക നികുതിയായി സമാഹരിക്കാനുള്ള നീക്കവുമുണ്ട്. ഇതും ഭാവിക്കായി നിക്ഷേപിക്കാനുള്ള സാധാരണക്കാരന്റെ മനോഭാവത്തിനു തടസ്സം സൃഷ്ടിക്കാം. കേന്ദ്രബജറ്റിൽ നിങ്ങളുടെ പോക്കറ്റിനെയും ഭാവിയെയും ബാധിക്കുന്ന വിവിധ നിർദേശങ്ങൾ എന്തെല്ലാം?

ആദായനികുതി മാറ്റങ്ങൾ ഒറ്റനോട്ടത്തിൽ

മാസം ഒരു ലക്ഷം രൂപ വരുമാനമുള്ളവരുടെ നികുതി 85,000 രൂപയിൽനിന്ന് 68,750 രൂപയായി കുറയും.

പഴയ ഇൻകംടാക്സ് സ്ലാബിൽ മാറ്റമോ, ഇളവുകളോ ഒന്നും ഇല്ല. എല്ലാം പഴയതു പോലെതന്നെ. എന്നാൽ, പുതിയ സ്ലാബിൽ സ്റ്റാൻഡേർഡ് ഡിഡക്ഷൻ വർധിപ്പിച്ചതിനൊപ്പം സ്ലാബ് തുകയിലും മാറ്റം വരുത്തിയിട്ടുണ്ട്. സ്റ്റാൻഡേർഡ് ഡിഡക്ഷൻ നിലവിലെ 50,000 രൂപയിൽനിന്ന് 75,000 രൂപയാക്കി.

കുടുംബ പെൻഷൻ വാങ്ങുന്നവർക്ക് 15,000 രൂപയായിരുന്ന സ്റ്റാൻഡേർഡ് ഡിഡക്ഷൻ 25,000 രൂപയാക്കി വർധിപ്പിച്ചു.

പുതിയ സ്റ്റാബ്

പഴയതും പുതിയതുമായ സ്ലാബുകളിലെ സെസുകളും സർ ചാർജുകളും നിലവിലുള്ളതുപോലെ തുടരും. റിബേറ്റിനെക്കുറിച്ച് ഒന്നും പറഞ്ഞിട്ടില്ലാത്തതിനാൽ പഴയതും പുതിയതുമായ സ്ലാബുകളിലുള്ള റിബേറ്റ് നിലവിലേതുപോലെ തുടരും എന്നു കരുതാം. അതായത്, പുതിയ സ്ലാബിൽ ഏഴു ലക്ഷം രൂപവരെയും പഴയതിൽ അഞ്ചു ലക്ഷം രൂപ വരെയുമുള്ള നികുതിബാധക വരുമാനത്തിന് ടാക്സ് നൽകേണ്ടതില്ല.

ഒരു ലക്ഷം രൂപ ശമ്പളക്കാർക്ക് 16,250 രൂപ ലാഭം