പെരുത്തുണ്ട് പെരുന്നാൾ കിസ്സകൾ

ഏത് ആഘോഷത്തിനും അഞ്ച് തലമുറകൾ ഒത്തുകൂടും കണ്ണൂർ സിറ്റിയിലെ പുതിയപീടികയിൽ തറവാട്ടിൽ. വല്യുമ്മ സൈനബിക്ക് ചുറ്റും കഥകളും വിശേഷങ്ങളും നിറയും. ആ ഒത്തുകൂടലിലുണ്ട് ഒരു പെരുന്നാൾ രാവിന്റെ മൊഞ്ച്...

- എം.സി. നിഹ്മത്ത്

ചെറുതൊന്നും അല്ല, 'ഇമ്മിണി ബല്യ പെരുന്നാൾ ഒരുക്കത്തിന്റെ പകിട്ടുണ്ട് ഇപ്പോൾ കണ്ണൂർ സിറ്റിയിലെ പുതിയപടികയിൽ തറവാട്ടിൽ. വീടകമാകെ മക്കളും അവരുടെ മക്കളും പേരക്കുട്ടികളുമായി പെരുത്ത് സന്തോഷത്തിന്റെ ഓട്ടപ്പാച്ചിൽ. എല്ലാവരുടെയും വിശേഷങ്ങൾ കേട്ട് ചിരിയും നിർദേശങ്ങളുമായി വല്യുമ്മ സൈനബി. അതിനിടയിൽ തന്നെ പെരുന്നാൾ കഥകൾ പറയാൻ ഉമ്മക്കൊപ്പം ചുറ്റും കൂടി മക്കൾ. ഒരുപാടുണ്ട് പോയകാലത്തെ പെരുന്നാൾ ഓർമകൾ.

നോമ്പിനും പെരുന്നാളിനും അപ്പുറം കുടുംബ കൂട്ടായ്മകളായിരുന്നു ഇവിടെ ഓരോ ആഘോഷവും. മക്കളും പേരമക്കളും അവരുടെ മക്കളുമെല്ലാം ചുറ്റുമിരുന്നപ്പോൾ 78കാരി സൈനബി വീണ്ടും പഴയ കഥാവരമ്പുകളിലൂടെ മനസ്സ് ഓടിച്ചു. പ്രയാസങ്ങളും സന്തോഷങ്ങളും നിറഞ്ഞ യാത്ര. ഒരു കൂട്ടുകുടുംബത്തിന്റെ കഥ കൂടി നിവരും അതിലൂടെ...

സൈനബിക്ക് എട്ടാണ് മക്കൾ. നാല് ആണും നാലു പെണ്ണും. എട്ടു മക്കളും മരുമ ക്കളും പേരമക്കളും അവരുടെ മക്കളുമായി അഞ്ചു തലമുറയുടെ ഉമ്മ.

സൈബുന്നിസ, സറീന, മഹബൂബ, നസീമ, മൻസൂർ, അജ്മൽ, നവാസ്, ജംഷീദ് എന്നിവർ മക്കൾ. അഞ്ചാമത്തെ മകൾ നസീമയുടെ മകൾ ഷിറയുടെ മകൻ അംറ് ഇബിൻ വഹീദാണ് കുടുംബത്തിലെ ഏറ്റവും ഇളയതരി. അഞ്ചു മാസമാണ് പ്രായം.

മൂത്തമകൾ സൈബുന്നിസ തന്നെ ആദ്യം പെരുന്നാൾ കിസകളുടെ കെട്ടഴിച്ചു...

സൈബുന്നിസ: പണ്ട് പെരുന്നാൾ തലേന്നത്തെ ആ ഒരുക്കമുണ്ടല്ലോ. അതൊരു വലിയ സംഭവമാണ്. ആളുകളെക്കെണ്ട് നിറഞ്ഞ പലചരക്കുകടയിൽ പോയി സാധനങ്ങൾ വാങ്ങിക്കൊണ്ടു വരുകയെന്നതു തന്നെ വലിയ പണിയാണ്. ഏറെ നേരം കാത്തിരിക്കണം എല്ലാം കിട്ടാൻ. വീട്ടിലെ മൂത്തവരായ ഞങ്ങൾ പെണ്ണുങ്ങളായിരുന്നു വലിയ സഞ്ചിയുമായി കടയിൽ പോകുക.

ഇരുകൈയിലും തോളിലുമായി മാറ്റിപ്പിടിച്ച് വലിയ ആ സഞ്ചികളുമായി ഓടിക്കിതച്ച് വീട്ടിലെത്തിയാൽ ഇരിക്കാനൊന്നും സമയമുണ്ടാവില്ല. അടുത്ത പണി തുടങ്ങണം. എത്രയൊക്കെ പണിയാണങ്കിലും ആ കാലം ഓർക്കുമ്പോഴുള്ള ഹരം ഒന്ന് വേറെ തന്നെ.

ഇതിനിടെ അനിയത്തി മഹബൂബയുടെ ഇടപെടൽ

മഹബൂബ: സാധനങ്ങൾ കിട്ടിയിട്ട് എന്താ... അത് പാചകം ചെയ്യാൻ ഗ്യാസ് ഒന്നും ഇല്ലാത്ത കാലമല്ലേ. വിറക് ഒരുക്കുന്നത് അതിലും വലിയ പണിയാണ്. പെരുന്നാളിനു മുൻപുതന്നെ വിറക് ശേഖരിച്ചുതുടങ്ങും. തലച്ചുമടാക്കി എത്ര വിറകുകെട്ടുകളാണ് കൊണ്ടുവന്നിട്ടുള്ളത്.