ഈസ്റ്റർ ഓർമകളിലെ നിറങ്ങൾ

മനസ്സിലെ ഓർമക്കെട്ടുകളിൽനിന്ന് ഈസ്റ്റർ വിശേഷങ്ങൾ പങ്കുവെക്കുകയാണ് എഴുത്തുകാരി ആനി വള്ളിക്കാപൻ. കുരുത്തോലയുടെ തുഞ്ചം നുള്ളി പ്രാർഥിച്ച് കുരിശുവെച്ച് പുഴുങ്ങിയെടുക്കുന്ന ഇണ്ടറിയപവും പെസഹാപാലും വിശുദ്ധമായ ഒരു വലിയ ഓർമപുതുക്കലിന്റെ പ്രതീകമാണ്...

- ആനി വള്ളിക്കാപ്പൻ

ഈസ്റ്റർ എനിക്കെന്നും രക്ഷയുടെ, പ്രത്യാശയുടെ, പ്രിയപ്പെട്ടവരിലേക്കുള്ള മടങ്ങിപ്പോകലിന്റെ തിരുനാളാണ്.

പാലായിലെ ബോർഡിങ് സ്കൂളിൽ പഠിക്കുമ്പോൾ ഈസ്റ്റർ അവധി വരുന്നതും കാത്ത് ദിവസങ്ങൾ എണ്ണിയിരിക്കും. അതിനായി കുറെയധികം പുളിങ്കുരുകൾ പഴയൊരു പ്രോട്ടിനെക്സിന്റെ തകര പാട്ടയിൽ സൂക്ഷിച്ചുവെച്ചിരുന്നു. വല്യപരീക്ഷയുടെ ടൈംടേബ്ൾ കിട്ടുന്ന ദിവസം മുതൽ ഓരോ പുളിങ്കുരുകളായി ഡപ്പിയിൽനിന്ന് എടുത്തു മാറ്റും. അങ്ങനെ മാറ്റിമാറ്റി ഒടുവിൽ അവസാനത്തെ പുളിങ്കുരുവിലെത്തുമ്പോൾ മനസ്സിന്റെ സന്തോഷത്തിന് വല്ല കൈയും കണക്കുമുണ്ടോ

ഡപ്പി കാലിയാകുമ്പോൾ പിന്നെ എടുപ്പത് സന്തോഷവും പേറി ഒരു പോക്കാണ്, മാർമല വീട്ടിലേക്ക്...

അതായിരുന്നു കുട്ടിക്കാലത്തെ എന്റെ ഏറ്റവും വലിയ രക്ഷപ്പെടൽ. എനിക്കന്ന് വീട്ടിലേക്ക് രക്ഷപ്പെടണമെങ്കിൽ 'കർത്താവ് തമ്പുരാൻ കഴുവിൽ തൂങ്ങി മരിക്കണമായിരുന്നുവെന്ന് ഞാനെന്റെ ഡയറിയിലും എഴുതിവെച്ചു. ജീവിതത്തിലെ മറ്റുചില സന്തോഷങ്ങളുടെ കൂട്ടത്തിൽ കൂടി ആ സഹനം ഒരിക്കലും മറക്കപ്പെടാൻ പാടില്ലെന്നത് എനിക്ക് വലിയ നിർബന്ധമായിരുന്നു.

പണ്ടേ തന്നെ വലിയ ആളും അനക്കവുമൊന്നുമില്ലാത്ത ഈസ്റ്റർ ഓർമകളാണ് എനിക്കുള്ളത്. വീട്ടിൽ വല്യപ്പച്ചനും (വർക്കി വള്ളിക്കാപ്പൻ), അച്ചാച്ചനും (സൈമൺ വള്ളിക്കാപ്പൻ എന്നായിരുന്നു ഒഫിഷ്യൽ പേരെങ്കിലും മോണ്ടിച്ചൻ എന്നാണ് എല്ലാവരും വിളിച്ചിരുന്നത്) അമ്മയും (അന്നമ്മ) ചേട്ടനും (സനു സൈമൺ) ഞാനും കാണും. എന്റെ കുട്ടിക്കാലത്ത് അടുക്കം- വെള്ളാനി -മാർമല റൂട്ടിലൊന്നും കറന്റില്ല. ടാറിട്ട നല്ലൊരു റോഡ് പോലുമില്ല. അതുകൊണ്ടുതന്നെ ചുരുക്കം ചില ബന്ധുമിത്രാദികൾ ഒഴിച്ചാൽ മറ്റാരും മാർമലക്ക് വരവില്ല.

മുടങ്ങാതെ എല്ലാ വർഷവും ഈസ്റ്ററിന് എന്റെ അമ്മ അമ്പത് നോമ്പെടുക്കും. ഈസ്റ്ററിന് ഒരാഴ്ച മുന്നേ ഞങ്ങളെ പള്ളിയിൽ കൂട്ടിക്കൊണ്ടുപോയി പ്രാർഥിപ്പിച്ച് കുമ്പസാരിപ്പിക്കാൻ മുൻകൈയെടുത്തിരുന്നതും അമ്മ തന്നെയാണ്.

തലേവർഷത്തെ കുരുത്തോലയുടെ തുഞ്ചം നുള്ളി പ്രാർഥിച്ച് കുരിശുവെച്ച് പുഴുങ്ങിയെടുക്കുന്ന ഇണ്ടറിയപ്പവും ശർക്കര പാനിയും തേങ്ങാപ്പാലും ചേർത്ത് തയാറാക്കിയെടുക്കുന്ന പെസഹാപ്പാലും വിശുദ്ധമായ ഒരു വലിയ ഓർമപുതുക്കലിന്റെ പ്രതീകമാണ്.