ഇതെന്തു ചിരിയിത്.....

എല്ലാ ആകുലതകളും അകറ്റുംവിധം ചിരിക്കാൻ നമ്മളിൽ എത്ര പേർക്കു കഴിയും. നൂറുകൂട്ടം പ്രശ്നങ്ങളാണോ ചിരിക്ക് തടസ്സം?. എങ്കിൽ മാനസിക സംഘർഷങ്ങളെല്ലാം ദൂരേക്ക് എറിഞ്ഞ് നിഷ്കളങ്കമായി ചിരിക്കാൻ പഠിപ്പിക്കുന്ന സുനിൽകുമാറിനെ പരിചയപ്പെടാം...

- അനസ് അസീൻ

 ചിരിയുടെ പല വേർഷനും നിങ്ങൾ കണ്ടിട്ടുണ്ടാകും. എന്നാൽ എസ്.വി. സുനിൽ കുമാറിന്റെ 'മാരക' ചിരികൾ കണ്ടാൽ പിന്നെ ആരായാലും ചിരിച്ചുചിരിച്ച് ഒരു വഴിക്കാകും. അതൊരു കൂട്ടച്ചിരിയായി സുനിലും കൂട്ടരും കൂടെച്ചേരും.

കൊച്ചിയിൽ പ്രായഭേദമെന്യേ അനേകരെ ചിരിപ്പിച്ച് കൈയിലെടുത്തിട്ടുണ്ട് ചിരി ക്ലബ് പരിശീലകനായ എസ് .വി. സുനിൽകുമാർ. ചിരിയുടെ മാസ്റ്റർ ട്രെയിനറും ചിരി യോഗ അംബാസഡറുമാണ് അദ്ദേഹം. അതുമാത്രമല്ല, ചിരിയിൽ ഗോൾഡൻ ബുക്ക് ഓഫ് റെക്കോഡ്സും ഏഷ്യ ബുക്ക് ഓഫ് റെക്കോഡും ഇന്ത്യ ബുക്ക് ഓഫ് റെക്കോഡുകളും വരെ സ്വന്തമാക്കിയിട്ടുമുണ്ട്.

എത്ര നേരം വേണമെങ്കിലും ചിരിക്കും. പലതരത്തിലും ചിരിക്കും. ഇനി മുന്നിൽ എത്ര മുഖം കനപ്പിച്ച് സംഘർഷ മനസുമായി ആരെങ്കിലും വന്നാൽ അങ്ങനെയങ്ങ് വിടില്ല. പലതരം ചിരികൾ പരിശീലിപ്പിച്ച് ചിരിപ്പിച്ചേ വിടൂ. എന്തിനിങ്ങനെ ടെൻഷൻ അടിച്ച് രോഗങ്ങൾ ശരീരത്തിൽ ഏറ്റുവാങ്ങണമെന്ന് ചോദിക്കും ഇദ്ദേഹം.

ചിരി വലിയ ആയുധം