ചങ്കാണ്.ചങ്കിലാണ്.

സുഹൃത്തുക്കൾ നമ്മുടെ പെരുമാറ്റത്തെയും ധാരണകളെയും ജീവിതവീക്ഷണത്തെയും സ്വാധീനിക്കുന്നുണ്ട്. ഫോൺ ചതുരത്തിന്റെ നിശ്ചതനത്വത്തിലേക്ക് ഉൾവലിയുന്ന ഇക്കാലത്ത്, ഗാഢസൗഹൃദങ്ങളുടെ പ്രയോജനങ്ങൾ അറിഞ്ഞിരിക്കാം...

- ഡോ. ഷാഹുൽ അമീൻ

ഓരോ സുഹൃത്തും, നമ്മുടെതന്നെ ആത്മാവ് മറ്റൊരു ദേഹത്തിൽ വസിക്കുന്നതാണ്' -അരി സ്റ്റോട്ടിൽ.

ആഗസ്റ്റിലെ ആദ്യ ഞായർ ഇന്ത്യയിൽ അന്തർദേശീയ സൗ ഹൃദ ദിനമാണ്. സു ഹൃത്തുക്കൾ നമ്മുടെ പെരുമാറ്റത്തെയും ധാരണകളെയും ജീവിതവീക്ഷണത്തെയുമൊക്കെ സ്വാധീനിക്കുന്നുണ്ട്. തീവ്ര തക്കനുസരിച്ച് സൗ ഹൃദങ്ങളെ വെറും പരിചയം, കാഷ്വൽ ബന്ധം, അടുത്ത ബന്ധം, ഗാഢസൗഹൃദം എന്നിങ്ങനെ നാലായി തിരിക്കാം. മിക്കവരും ഏതു സദസ്സിലും ഫോൺ ചതുരത്തിന്റെ നിശ്ചനത്വത്തിലേക്ക് ഉൾവലിയുന്ന ഒരു കാലത്ത്, ഗാഢസൗഹൃദങ്ങളുടെ പ്രത്യേകതകളും പ്രയോജനങ്ങളുമൊക്കെ ഒന്നറിഞ്ഞിരിക്കാം.

സൗഹൃദ നന്മകൾ 

സമ്മർദവേളകളിൽ സഹാനുഭൂതിയും പിന്തുണയും ലഭ്യമാവുക. 

തനിച്ചല്ലെന്ന ബോധം കിട്ടുക. നമ്മെക്കുറിച്ച് കൂടുതലറിയാനും ഉള്ളിനെയലട്ടുന്ന രഹസ്യങ്ങൾ  പങ്കുവെക്കാനും അവസരമൊരുങ്ങുക.

മനസ്സന്തുഷ്ടിയും സ്വയംമതിപ്പും പ്രശ്നപരിഹാരശേഷിയും മെച്ചപ്പെടുക.

ജീവിതത്തിന് ഒരു ലക്ഷ്യബോധവും നേട്ടങ്ങൾ എത്തി പിടിക്കാനുള്ള പ്രോത്സാഹനവും ലഭിക്കുക.

നാം യാഥാർഥ്യ ബോധത്തോടെയല്ലാതെ പെരുമാറുന്നെങ്കിൽ (തീരെ ചേരാത്ത ഒരു ഡ്രസ് ധരിക്കുന്നതു തൊട്ട് ഒരു മോശം വ്യക്തിയെ പ്രേമഭാജനമായി തിരഞ്ഞെടുക്കുന്നതു വരെയുള്ള കാര്യങ്ങളിൽ) അതു ചൂണ്ടിക്കാണിക്കാൻ അടുത്ത കൂട്ടുകാർക്കേ ധൈര്യവും സ്വാതന്ത്ര്യവും കാണൂ.

ശാരീരികാരോഗ്യത്തിനും നല്ല സൗഹൃദങ്ങൾ ഗുണകരമാകുന്നുണ്ട്. ബ്ലഡ് പ്രഷർ കുറയുക, രോഗങ്ങൾ താരതമ്യേന വേഗത്തിൽ സുഖപ്പെടുക, ആയുസ്സ് മെച്ചപ്പെടുക എന്നിവ ഉദാഹരണമാണ്. സൗഹൃദങ്ങൾ ആയുർദൈർഘ്യത്തെ തുണക്കുന്നത് ഗർഭധാരണം, ആശുപത്രിവാസം, ഉറ്റവരു ടെ വിരഹം തുടങ്ങിയ വേളകളിൽ സഹായ സഹകരണങ്ങൾ ലഭ്യമാക്കിയും വ്യായാമവും ആരോഗ്യകരമായ ഭക്ഷണശൈലിയും പോലുള്ള നല്ല രീതികൾ പ്രോത്സാഹിപ്പിച്ചും ലഹരിയുപയോഗംപോലുള്ള ദുശ്ശീലങ്ങളിൽനിന്നു പിൻതിരിപ്പിച്ചുമൊക്കെയാണ്. സാമൂഹിക ബന്ധങ്ങളുടെ അഭാവം ആയുസ്സ് കുറക്കുന്നതിന്റെ തോത്, ദിനേന 15 സിഗരറ്റ് വലിക്കുന്നതിനു തുല്യവും അമിതവണ്ണം, മദ്യപാനം, വായുമലിനീകരണം എന്നിവയുടേതിൽ നിന്നു കൂടുതലുമാണ്.