മരുഭൂമിയിലൊരു കൊച്ചു കേരളം

കണ്ണിനും മനസ്സിനും ശരീരത്തിനും ആനന്ദംപകരുന്ന കാഴ്ചയും കാലാവസ്ഥയും. മനോഹരമായ കുന്നിൻ ചെരുവുകൾ, കണ്ണെത്താ ദൂരത്തോളം പുൽമേടുകൾ. തെങ്ങിൻ തോപ്പും കാട്ടരുവിയും വാഴത്തോട്ടവുമായി മരുഭൂമിയുടെ നടുവിലെ കേരളം പോലൊരു നാടായ ഒമാനിലെ സലാലയിലേക്കൊരു യാത്ര...

- ഷമീമ വളപട്ടണം

ചാറ്റൽ മഴയും തഴുകിത്തണുപ്പിക്കുന്ന കുളിർ കാറ്റും കാഴ്ചകളെ മുടിക്കളയുന്ന മഞ്ഞും പച്ച പുതച്ചുകിടക്കുന്ന മരങ്ങളും മലകളും. മറ്റു ഗൾഫ് രാജ്യങ്ങളെന്നല്ല ഒമാനിലെ തന്നെ മറ്റു പ്രദേശങ്ങൾ പോലും കഠിന ചൂടിൽ വെന്തുരുകുമ്പോൾ സലാലയിൽ കുളിരുകോരും കാലമാണ്. ഒമാന്റെ തലസ്ഥാനമായ മസ്കത്തിൽ നിന്ന് 1000 കിലോമീറ്റർ അപ്പുറമുള്ള സലാലയിൽ ജൂൺ - സെപ്റ്റംബർ മാസങ്ങൾ ഖരീഫ് നാളുകൾ എന്നാണറിയപ്പെടുന്നത്. ഈ മാസങ്ങളിൽ സലാല തണുപ്പേറിയതായി മാറുന്നു എന്നത് അത്ഭുതമാണ്.

ഖരീഫ് നാളിൽ വല്ല അവധിയും ഒത്തുവന്നാൽ എല്ലാവരും പോകാൻ ആഗ്രഹിക്കുന്നത് സലാലയിലേക്കാണ്. കഠിന ചൂടിൽ നിന്ന് മോചനം, മനസ്സിനും കണ്ണിനും ശരീരത്തിനും ആനന്ദം പകരുന്ന കാഴ്ചയും കാലാവസ്ഥയും. ആ നാളുകളിൽ സലാലയിലേക്ക് പോകുന്ന ആരുംതന്നെ ഒരു മടക്കയാത്ര ആഗ്രഹിക്കില്ല. പൊടിപൊടിയായി പെയ്തുകൊണ്ടിരിക്കുന്ന മഴയും മൂടൽമഞ്ഞും പച്ചപ്പും ആസ്വദിച്ചുകൊണ്ടുള്ള യാത്ര അത്രയേറെ സുഖകരമാണ്.

അത്ഭുതക്കാഴ്ചകളായ ഒമാനിലെ മലകൾ

 ചരിത്രപ്രസിദ്ധമായ വിവിധ സ്ഥലങ്ങൾ. പ്രവാചകന്മാരുടെ ജീവിതത്തിലെ പല സംഭവങ്ങൾക്കും സാക്ഷ്യംവഹിച്ച പ്രദേശങ്ങൾ, കൊടുങ്ങല്ലൂർ ആസ്ഥാനമാക്കി ഭരണം നടത്തിയിരുന്ന ചേരമാൻ പെരുമാളിന്റെ ഖബറിടം. കണ്ണാടി പോലെ തിളക്കമാർന്ന വെള്ളം ഒഴുകിക്കൊണ്ടിരിക്കുന്ന അരുവികൾ. തെങ്ങിൻതോപ്പുകളും വാഴത്തോട്ടങ്ങളും കരിമ്പിൻ തോട്ടങ്ങളും മറ്റുപല ഫല വൃക്ഷങ്ങളാലും സമൃദ്ധമായ സലാല, കുന്തിരിക്ക മരങ്ങളും അങ്ങിങ്ങായി കാണാം. വഴി നീളെ ടെന്റ് കെട്ടി തേങ്ങയും ഇളനീരും പഴങ്ങളും വിൽക്കുന്നവർ. യാത്രക്കാർ പലരും വാഹനം നിർത്തി ഇളനീർ ജ്യൂസും കരിമ്പിൻ ജ്യൂസ് കുടിച്ചാണ് യാത്ര തുടരുന്നത്. സലാലയിൽ കൃഷി ചെയ്യുന്നതായതിനാൽ മിക്കവരും തിരിച്ചുപോകുമ്പോൾ ഇതൊക്കെ കൊണ്ടുപോകുന്നതും പതിവാണ്.

സലാലയിൽ കൂടുതലായും കാണുന്ന അതിമനോഹര കാഴ്ചയാണ് റോഡിന്റെ ഒരു വശം മുഴുവൻ മലകളും മറ്റൊരു വശം കടലും. പല രൂപത്തിലും ആകൃതിയിലും ഉയർന്നു കിടക്കുന്ന ഒമാനിലെ മലകൾ പലപ്പോഴും അത്ഭുതപ്പെടുത്തിയിട്ടുണ്ട്. ചില മലകൾ കാണുമ്പോൾ വളരെ പ്രസിദ്ധിയാർജിച്ച ശിൽപികൾ ചിത്രപ്പണികളാൽ കൊത്തി മിനുക്കിയെടുത്തതുപോലെ തോന്നിക്കും. കണ്ണുകളെ വിശ്വസിക്കാൻ പറ്റാത്തത്രയും രൂപഭംഗിയാണ്. ഒമാനിലെ ഓരോ കടലുകൾക്കുമുണ്ട് പ്രത്യേക ഭംഗി.

കുടുംബസമേതം സലാലയിലേക്ക്