കുട്ടികളെ മിടുക്കരാക്കും ഭക്ഷണം

പോഷക ഗുണമുള്ള ഭക്ഷണമാണ് എപ്പോഴും കുട്ടികൾക്ക് നൽകേണ്ടത്. വളരുന്ന ശരീരത്തിനു മാത്രമല്ല, തലച്ചോറിന്റെ വികാസത്തിനും ഇത് സഹായകരമാകും. കുട്ടികളുടെ ആരോഗ്യത്തിനും ഉത്സാഹത്തിനും സഹായകമായ ചില പ്രധാന ഭക്ഷണ ഇനങ്ങളിതാ...

- ഡോ. ലീനാ സാജു Group Manager. Clinical Nutrition, KIMS Health, Trivandrum

കുട്ടികളുടെ ആരോഗ്യവും വിദ്യാഭ്യാസവും സമൂഹത്തിന്റെ ഭാവി ഉയർത്തുന്നതിൽ നിർണായക പങ്കുവഹിക്കുന്നു. ആരോഗ്യവും പഠനവും പരസ്പരം ആധിപത്യമുള്ള രണ്ടു ഘടകങ്ങളാണ്. കുട്ടികൾ സജീവവും ആരോഗ്യവാനും ആയിരിക്കുമ്പോൾ മാത്രമേ പഠനത്തിൽ മികച്ച പ്രകടനം കാഴ്ചവെക്കാൻ കഴിയൂ.

ശാരീരികവും മാനസികവുമായ വളർച്ചക്ക് ആഹാര ക്രമത്തിന് പ്രാധാന്യം നൽകണം. പ്രോട്ടീൻ, കാർബോ ഹൈഡ്രേറ്റ്, വിറ്റമിനുകൾ, ധാതുക്കൾ, നാരുകൾ എന്നിവയടങ്ങിയ സമീകൃത ആഹാരം കുട്ടികളുടെ ആരോഗ്യകരമായ വളർച്ചക്ക് സഹായിക്കും. ഓരോ പ്രായത്തിലുമുള്ള കുട്ടി കൾക്കു വേണ്ട പോഷകങ്ങൾ അത് ഊർജമായാലും മാക്രോ -മൈക്രോ ന്യൂട്രിയൻസായാലും അവരുടെ ജെൻഡറിനെയും ഫിസിക്കൽ ആക്ടിവിറ്റി ലെവലിനെയും അടിസ്ഥാനമാക്കിയായിരിക്കും.

മധുരപാനീയങ്ങൾ, highly Processed/Ultra processed foods (UPFS) എന്നിവയുടെ ഉപയോഗത്തിൽ നിയന്ത്രണം കൊണ്ടുവരാനും പ്രത്യേക ശ്രദ്ധ പുലർത്തണം.

ഇത്തരം ഭക്ഷണത്തിന്റെ അമിത ഉപയോഗം കുട്ടികളുടെ ശാരീരിക-മാനസിക ആരോഗ്യത്തെ പ്രതികൂലമായി ബാധിക്കാം. അതുപോലെ ആഹാരസമയത്ത് കുട്ടികളുടെ ശ്രദ്ധതിരിക്കുന്ന മൊബൈൽ ടി.വി തുടങ്ങിയവയുടെ ഉപയോഗം കുറച്ച് ആഹാരത്തെ അറിഞ്ഞ് ആസ്വദിച്ച് കഴിക്കാൻ ശീലിപ്പിക്കുക.

കുട്ടികൾക്ക് ഗുണകരമായ ഭക്ഷണം

കുട്ടികളുടെ ആരോഗ്യത്തിനും വളർച്ചക്കും ശരിയായ ആഹാരശീലങ്ങൾ അനിവാര്യമാണ്. പോഷകസമൃദ്ധ ഭക്ഷണത്തിന് മാത്രമേ കുട്ടികളുടെ മൊത്തം വളർച്ചയും മാനസികാരോഗ്യവും ഉറപ്പാക്കാൻ കഴിയു. കുട്ടികളുടെ ആരോഗ്യത്തിനും ഉത്സാഹത്തിനും സഹായകമായ ചില പ്രധാന ഭക്ഷണ ഇനങ്ങൾ

ധാന്യം: അരി, ഗോതമ്പ് തുടങ്ങിയ ധാന്യങ്ങളിൽ നിന്നും റാഗി, ബജ്റ, തിന, മണി ച്ചോളം തുടങ്ങിയ ചെറുധാന്യങ്ങളിൽ നിന്നുമാണ് ശരീരത്തിനാവശ്യമായ 45-60 ശതമാനം ഊർജം ലഭിക്കുന്നത്. ഇവയിൽ അടങ്ങിയ അന്നജവും ബി വിറ്റമിനുകളും ധാതുക്കളും നാരുകളും ശരീരത്തിന് വേണ്ട ആരോഗ്യം നൽകുന്നു.