હોળી: હાર્દિક સ્વાતંત્ર્ય દિન!

યાર, દિલ્હીમાં તો લોકો હોળીના દિવસેય બેસણું રાખે.. સફેદ લેંઘોઝભ્ભો પહેરી હું બેસણામાં જવા નીકળ્યો, પણ ત્યાં સુધી પહોંચતાં તો હું મલ્ટિકલર થઈ ગયો!

- હર્ષદ પંડ્યા ‘શબ્દપ્રીત'

હોળી ફાગણ સુદ પૂનમે જ હોય એવું નથી, કેટલાક ઉત્સવપ્રિય લોકો તો બારે મહિના હોળી ઊજવતા હોય છે.

અમારી ‘દેવસિટી બંગલોઝ’ કોલોનીમાં રહેતા એક સ્વજન તો દિવાળીના કે બેસતા વર્ષના દિવસે પણ હોળી ઊજવી લેતાં હોય છે. એક દિવસ મેં એમને પૂછ્યું, ‘મિત્ર, તમે વાર-તહેવાર તો જુઓ.. ગમે ત્યારે, બસ મન થાય ત્યારે હોળી ઊજવતા રહો છો?’ ત્યારે એ છંછેડાઈ ગયાઃ ‘કેમ, અમે રાજકારણમાં નથી એ અમારો ગુનો છે? અમે પણ રોજેરોજ હોળી કેમ ન કરીએ?'

હોળીનો પ્રભાવ જ એટલો પ્રભાવશાળી છે કે કોઈ પણ વ્યક્તિ એના પ્રભાવમાં આમ સહેલાઈથી આવી જાય છે. કેટલાક બોલીને હોળી ઊજવે છે, તો કેટલાક પરોપકારી જીવ બીજા પાસે ન બોલવાનું બોલાવડાવીને હોળી ઊજવે છે. કેટલાક તો હોળી ઊજવવાનું નિમિત્ત શોધતા ફરતા હોય છે. અમારા એક મિત્ર છે. જ્યારે ફોન આવે ત્યારે પૂછેઃ ‘પંડ્યા, છે કંઈ નવાજૂની?’ ત્યારે હું એને કંટાળીને કહ્યું, ‘અલ્યા, આવું જ તે ગઈકાલે પણ પૂછેલું.. રોજ રોજ નવાજૂની તો હોતી હશે કંઈ?’ ત્યારે એ એવી રીતે વાત કરે કે જાણે હું કશુંક મહત્ત્વનું કામ કરવાનું ચૂકી ગયો હોઉં.. એ તરત જ બોલે, ‘એમ કંઈ ચાલે યાર? કંઈક તો નવાજૂની કરતા જ રહેવું પડે. તું ગઈકાલની વાત કરે છે, પણ હું તો તને ત્યાં સુધી કહ્યું કે નવાજૂની તો ‘ક્ષણે ક્ષણે સંભવામિ’! આપણામાં તાકાત હોવી જોઈએ નવાજૂની કરવાની.’

હોળી માટે આપણને ગમે એટલો પ્રેમ હોય, પણ એ તો વરસમાં એક જ વાર આવે. લગ્નજીવન અને કૅલેન્ડર – બેમાં આટલો જ ફેર!

હોળી-ધુળેટીના દિવસોને અમારો બાબુ બૉસ ‘હાર્દિક આઝાદી’ દિન તરીકે ઓળખાવે છે, એનું એવું કહેવું છે કે આપણે રાજકીય રીતે તો આઝાદી મેળવી શક્યા, પણ હૃદયની વાતને ગમતા પાત્ર આગળ ખુલ્લેઆમ પ્રગટ કરવાની આઝાદી હજી સુધી નથી મેળવી શક્યા. આવી આઝાદી આ દિવસોમાં જ મળતી હોય છે.