નરનારાયણદેવ મહોત્સવ ભુજમાં ગાયોનો મહિમા વધારશે

ભુજમાં નરનારાયણદેવની મૂર્તિની સ્થાપનાને ૨૦૦ વર્ષ પૂર્ણ થતાં યોજાનારા મહોત્સવમાં ગૌ મહિમા દર્શનના પ્રદર્શનમાં સામાન્ય લોકો દેશી ગાયનું મહત્ત્વ સમજે, તેને પાળવા તૈયાર થાય તે માટે પ્રોત્સાહિત કરવાનો પ્રયાસ કરાયો છે. ગાયની ઉત્પાદકતા માત્ર તેના દૂધ આધારિત ન રહેતાં ગોબર અને ગૌમૂત્રને વધુ મૂલ્યવાન બનાવીને ગૌપાલન વધુ પોષણક્ષમ બને તે માટે વિવિધ પ્રદર્શનો, ફિલ્મો, કઠપૂતળીના શૉ, સાચા ખેતીના મૉડેલ વગેરે થકી સમજણ અપાશે. પ્રદર્શનમાં કિચન ગાર્ડન કેવી રીતે કરી શકાય તે પણ સમજાવાશે.

- સુચિતા બોઘાણી કનર

મહારાષ્ટ્રના મહિલાના વિચારને મૂર્તિમંત કરી તૈયાર કરાયેલું કિચન ગાર્ડન

ભુજમાં આવેલા કાલુપુર મંદિર સંલગ્ન સ્વામિનારાયણ મંદિરે ભગવાન નરનારાયણદેવની મૂર્તિની સ્થાપનાને ૨૦૦ વર્ષ થતાં તા. ૧૮મીથી ૨૬મી એપ્રિલ સુધી દ્વિશતાબ્દી મહોત્સવનું આયોજન કરાયું છે. આ મહોત્સવ માટે ભુજ નજીકના મિરઝાપરની પાસે ૨૨૨ એકર જમીનમાં ‘બદ્રિકાશ્રમ ધામ’નું નિર્માણ કરાયું છે. જેમાં અનેક કાર્યક્રમો અને આકર્ષણો ઉપરાંત અઢી એકર જમીનમાં ‘ગૌ મહિમા દર્શન’ના નામે દેશી ગાયો આધારિત તદ્દન અલગ પ્રકારનું જ પ્રદર્શન યોજાઈ રહ્યું છે.

મંદિરમાં આવીને ગોબરમાંથી શણગારની વસ્તુઓ બનાવતી મહિલાઓ

આજે પશુપાલકો અને અન્ય લોકો ભેંસ કે જર્સી ગાયના પાલનને વધુ ફાયદાકારક સમજે છે. તેથી જ દેશી ગાયોની દશા કરુણ થઈ ગઈ છે. આજે ગલીએ ગલીએ ગાયો અને ગૌવંશ રખડે છે, કચરો ખાઈને પેટ ભરે છે. તેના કારણે તેના દૂધનું પોષણમૂલ્ય પણ ઘટી ગયું છે. આમ પણ દેશી ગાયની ઉત્પાદકતા તેના દૂધ આધારે જ ગણવામાં આવે છે, પરંતુ જો તેનાં ગોબર અને ગૌમૂત્રનું મૂલ્યવર્ધન કરી શકાય તો ગાયની ઉત્પાદકતા વધે અને તેનું પાલન કોઈને પણ પોસાઈ શકે. આજે ગોબરનો ઉપયોગ ખાતર તરીકે થાય છે, જ્યારે ગૌમૂત્રને ખેતીમાં જંતુનાશક તરીકે વપરાય છે, પરંતુ તેના અન્ય ઉપયોગો જો લોકોમાં પ્રચલિત બને તો ગાયો અને ગૌવંશને રખડતા મૂકવાનું પ્રમાણ ઘટી જાય. અનેક લોકો દેશી કે કાંકરેજ ગાય પાળવા તો ઇચ્છતા હોય, પરંતુ તે ખોટનો ધંધો પુરવાર થતો હોવાથી તેઓ ટાળે છે. જો ગાયનો ખર્ચ તેનાં દૂધ, ગોબર અને ગૌમૂત્રમાંથી મળી રહે તો તેને પાળવાવાળા લોકોની સંખ્યા પણ વધી શકે, સાથે લોકોનું આરોગ્ય પણ સુધરી શકે.