ક્રેમલીન પર હુમલાનો પ્રયાસ વાતનું વતેસર કે..

અમેરિકા અને યુરોપ યુક્રેનને વધુ ધારદાર અથવા અસરદાર શસ્ત્રો પૂરાં પાડવાના છે. પોલેન્ડ તરફથી યુક્રેનને ખુદ રશિયાની બનાવટના મિગ-૨૯ વિમાનો અપાઈ રહ્યાં છે

- વિનોદ પંડ્યા

રશિયા યુક્રેન પર આક્રમણ ક૨શે તો યુક્રેન સાત દિવસ પણ ટકી નહીં શકે. એક સમય હતો જ્યારે યુદ્ધ અને શસ્ત્રોના નિષ્ણાતો આ પ્રકારનું જ્ઞાન ફેલાવી રહ્યા હતા, પણ આજે યુદ્ધને પંદરમો મહિનો ચાલી રહ્યો છે અને સતત ચાલુ રહ્યું હોવા છતાં પરિણામ શું આવશે તે નક્કી નથી! યુક્રેન ખુવાર થયું છે તેના કરતાં રશિયા વધુ થયું, પણ ખૂબ વિશાળ હોવાને કારણે અને તાનાશાહી રાજ્ય વ્યવસ્થા હોવાથી એ ઘા જલ્દીથી દેખાતાં નથી. યુક્રેન પાસે યુદ્ધ માટેનાં ટાંચાં સાધનો છે. હવે તો પોતાનાં ખાસ બચ્યાં જ નથી, પરંતુ યુરોપના દેશો અને અમેરિકાએ યુક્રેનના ચીર પૂરવાનું ચાલુ રાખ્યું છે. ચીરહરણ વખતે દ્રૌપદીની જેવી સ્થિતિ થઈ હતી તેવી યુક્રેનની થઈ છે. રક્ષા માટે વધુ મદદે આવવાની સતત ગુહાર લગાવવી પડે છે. તો પણ ગઈ ત્રીજી મેના રોજ પુતિનના સત્તાવાર નિવાસસ્થાન અને રશિયન શાસનની ગાદી સમાન મોસ્કોના ક્રેમલિન પર હુમલો કરવા માટે બે ડ્રોન વિમાનો પહોંચી ગયાં હતાં. ક્રેમલિન નજીક જ રશિયન લશ્કરે તેને તોડી પાડ્યાં. આ સમાચાર અને તેના સમર્થનમાં જે વીડિયો ફિલ્મ દુનિયા સમક્ષ રજૂ કરાયાં છે તે રશિયા દ્વારા કરાયાં છે. તેથી તે સાચા હોઈ શકે અને ન પણ હોઈ શકે .યુદ્ધમાં સાચું શું અને ખોટું શું તે કહેવું મુશ્કેલ હોય છે. ખોટો અથવા સાવ ઊપજાવી કાઢેલી, ખોટી રીતે સ્ટેજમેનેજ કરેલી વાતો ઇરાદાપૂર્વક ચલાવવામાં આવતી હોય છે.