રાજકાજ

લોકસભામાં ઘૂસણખોરી શાસક - વિપક્ષની વિસંવાદિતા

- ચાણક્ય

૧૩ ડિસેમ્બર, ૨૦૦૧નો દિવસ સંસદ પર ત્રાસવાદી હુમલો અને આઠ સુરક્ષા જવાનો શહીદ થયા, પરંતુ ત્રાસવાદીઓના ઇરાદા નિષ્ફળ બનાવાયા હતા. એ હુમલા પછી સંસદની સુરક્ષા વ્યવસ્થામાં સુધારા કરાયા હતા. ૧૩ ડિસેમ્બર, ૨૦૨૩નો દિવસ.

સંસદ પર ત્રાસવાદી હુમલાનો જ દિવસ અને સંસદના નવા ભવનમાં બે ભારતીય નાગરિકો મુલાકાતી તરીકે વિધિવત્ પાસ લઈને સલામતી વ્યવસ્થામાં રહેલી ક્ષતિનો લાભ કે ગેરલાભ લઈને પ્રેક્ષક ગૅલેરી મારફત પ્રવેશી, ગૅલેરીમાંથી જ લોકસભામાં ચાલતી કાર્યવાહી દરમિયાન ગૃહમાં કૂદકો લગાવી અંદર ઘૂસીને તેમના બૂટમાં છૂપાયેલ નાના ગેસ કેનસ્ટર કાઢીને રંગીન ગેસ છોડી સ્પીકરના આસન તરફ આગળ વધતા જતા હતા ત્યારે સાંસદોએ તેમને પકડી પાડ્યા હતા અને પોલીસને હવાલે કર્યા હતા. નવા સંસદ ભવનને સૌથી વધુ સુરક્ષિત માનવામાં આવતું હતું, પરંતુ તેમાં પણ આ પ્રકારની ઘટના બની. હવે તેમાંથી બોધપાઠ લઈને સુરક્ષા વધુ કડક બનાવાશે.