કચ્છના દરિયા કિનારાની જીવસૃષ્ટિ વિશે સંશોધન

કચ્છની દરિયાઈ જીવસૃષ્ટિની જેમ જ દરિયા કિનારા ઉપર પણ વસનારા સજીવો પણ ભારે વૈવિધ્ય ધરાવે છે. માનવીય પ્રવૃત્તિ દરિયા કિનારાની જીવસૃષ્ટિને ખલેલ પહોંચાડે છે. આ જિલ્લો અત્યારે વિકાસપથ ઉપર ખૂબ ઝડપથી દોડ લગાવી રહ્યો છે, ત્યારે તેની આડઅસર પ્રકૃતિ, પર્યાવરણ અને સજીવો ઉપર થઈ રહી છે. વિકાસને રોકવો યોગ્ય નથી, પરંતુ વિકાસની સાથે પર્યાવરણને હાનિ પહોંચાડનારી વસ્તુઓ કે પરિબળોમાં બદલાવ લાવીને શક્ય તેટલું ઓછું નુકસાન થાય તે માટે પ્રયત્ન કરવા જોઈએ.

માંડવીની એક છાત્રાએ કચ્છના દરિયા કિનારા ઉપરના સજીવો વિશે સંશોધન કરીને મરીન ઝૂઓલૉજીમાં પીએચ.ડી.ની પદવી મેળવી છે. તેણે પોતાના અભ્યાસાર્થે કરેલું સંશોધન હવે પછી આ વિષય ઉપર આગળ સંશોધન કરનારાઓ માટે પાયાનું કામ કરશે. તેના સંશોધન મુજબ માછીમારી, પ્રવાસન, ઉદ્યોગો, પ્રદૂષણ જેવાં અનેક પરિબળોના કારણે દરિયા કિનારા ઉપર વસતા જીવોને ભારે અસર પહોંચી રહી છે. જ્યાં માનવીય પ્રવૃત્તિ વધુ ત્યાં દરિયાઈ સજીવોની સંખ્યા અને તેમની પ્રજાતિ ઓછી એવું સમીકરણ અત્યારે જોવા મળી રહ્યું છે.

કચ્છ જિલ્લો ૪૦૬ કિ.મી. લાંબો દરિયાકિનારો ધરાવે છે. આ દરિયા કિનારા ઉપર જીવસૃષ્ટિની વિવિધતા જોઈ શકાય છે. અહીં સૂક્ષ્મ જીવોથી માંડીને કાચબા જેવા વિશાળ જીવો પણ જોવા મળે છે. આ જૈવ વિવિધતા ને પર્યાવરણના અને માનવજાતિના રક્ષણાર્થે સાચવવાની જરૂર છે. પરંતુ છેલ્લા બે- અઢી દાયકાથી ચાલી રહેલી કચ્છની યાત્રાની આડઅસરરૂપે દરિયાકિનારા ઉપરની જીવસૃષ્ટિને ખલેલ પહોંચી રહી છે. વિકાસ તો આવશ્યક છે જ, પરંતુ તેનાથી થતું નુકસાન નિવારવું જોઈએ અને તે જો અનિવાર્ય જ હોય તો તેની અસર ઘટે તેવાં પગલાં લેવાવા  જોઈએ. નુકસાનકર્તા પરિબળોનો પર્યાય વિચારી, ઓછામાં ઓછું નુકસાન કરનારા પરિબળોને અપનાવવા જોઈએ.

અત્યાર સુધી કચ્છના દરિયા કિનારા ઉપરની જીવસૃષ્ટિ વિશે અનેક અભ્યાસો તો થયા છે, પરંતુ તેમાં એકસૂત્રતા નથી. જેથી કોઈને આ વિશે સંશોધન કરવું હોય તો પાયાની માહિતીનો અભાવ તેના કાર્યમાં મોટી અડચણ પેદા કરે છે. કચ્છના માંડવીની એક વિદ્યાર્થિનીએ તાજેતરમાં જ મરીન સાયન્સ વિષયમાં દરિયાકિનારા ઉપરના ઇન્ટર ટાઇડલ ઝોન (ભરતી અને ઓટની વચ્ચે થોડા સમય સુધી ખાલી રહેતી દરિયાકિનારા ની જગ્યા)માં વસતા સજીવો વિશે સંશોધન કરીને પીએચ.ડી.ની ડિગ્રી મેળવી છે. આ સંશોધન ભવિષ્યના સંશોધનકર્તાઓ માટે એક મજબૂત પાયાની ગરજ સારીને પ્રમાણભૂત માહિતી સ્રોત બનશે. તેણે કરેલા સંશોધન પરથી ખ્યાલ આવે છે કે, ધરતી પર વસતા સજીવો, દરિયાઈ જીવોની સાથે-સાથે દરિયાકિનારા ઉપરના સજીવો પણ માનવીય વિકાસની કિંમત ચૂકવી રહ્યા છે. જ્યાં વધુ માનવીય પ્રવૃત્તિઓ થાય છે ત્યાં સજીવોની સંખ્યા ઘટેલી અને સજીવોની પ્રજાતિ પણ ઓછી જોવા મળે છે.