આસ્થા

ચૈત્ર માસમાં કરો ટૂંકી ઉત્તરવાહિની નર્મદા પરિક્રમા

- જિજ્ઞેશ ઠાકર

નર્મદા જિલ્લાના નાંદોદ તાલુકાના રામપુરાથી શરૂ કરીને તિલકવાડા સુધીની પરિક્રમા છે. ઘણા યાત્રિકો આ પંચકોષી પરિક્રમા કરીને સમગ્ર નર્મદા પરિક્રમા જેટલું પુણ્યનું ભાથું બાંધી લે છે. પગપાળા યાત્રામાં બે વખત હોડીમાં બેસીને નર્મદા નદી પાર કરીને ટૂંકી પરિક્રમા પૂર્ણ થાય છે. દર વર્ષે આ પંચકોષી પરિક્રમા માટે હજારો યાત્રાળુઓ આવે છે.

કાંઠે-કાંઠે પરિક્રમા થતી હોય તેવી નર્મદા નદીનું વિશેષ મહત્ત્વ છે. એટલા માટે જ હજારો પરિક્રમાવાસીઓ મા નર્મદાની પરિક્રમા કરીને પુણ્યનું ભાથું બાંધે છે, પરંતુ સમગ્ર નર્મદા નદીની પરિક્રમાનો રૂટ ત્રણથી સાડા ત્રણ હજાર કિલોમીટરનો છે. જેમાં પગપાળા ચાલવા માટે ખૂબ લાંબો સમય વીતે છે. કેટલાક લોકો એટલા માટે કટકે કટકે પણ પરિક્રમા કરતા હોય છે, પણ જે શ્રદ્ધાળુઓ આ સમગ્ર પરિક્રમા કરી શકતા નથી, તેમના માટે શાસ્ત્રોમાં ઉત્તરવાહિની પરિક્રમાનું મહત્ત્વ દર્શાવવામાં આવ્યું છે. જેને લીધે દર વર્ષે ચૈત્ર સુદ એકમથી ચૈત્ર વદ અમાસ સુધી આ પરિક્રમા થાય છે.