પંચામૃત

બાળકને એવો પ્રેમ આપો જે તેને સુધારે

- ભૂપત વડોદેરિઆ

એક ગૃહસ્થે હમણાં કહ્યું: 'મારા દીકરાની કુંડળી જોઈને જ્યોતિષીએ કહ્યું કે આ છોકરો મોટો થઈને મા-બાપની સંપત્તિનો નાશ કરશે. હવે એ છોકરાના નામે મેં થોડી મિલકત ઊભી કરી છે. હવે મારે શું કરવું? મનેખૂબ ચિંતા થાય છે. છોકરાના ભવિષ્યનો વિચાર કરીએ છીએ અને અમે પતિપત્ની શાંતિથી જમી શકતાં નથી. આ છોકરાનું શું થશે? એ કઈ રીતે સુધરે?'

ગૃહસ્થે જે વાત કરી તે કિશોરાવસ્થાના વિચિત્ર વહેવારોની હતી. આ બધા વહેવારો વાંધાજનક હતા, તેની ના નહીં, પણ બાળક કે કિશોરના આવા વિચિત્ર વર્તનને પણ પુખ્ત વયના વિવેકથી તોળવા જેવું નથી હોતું. બાળક મટીને કિશોર બનીરહેલાં બાળકો ઘણા કિસ્સામાં આવી જ રીતે વર્તતાં હોય છે. મોટી ઉંમરે આ બધું યાદ કરીને સ્વીકારે પણ છે કે, પોતે બાળક કે કિશોર તરીકે આવી ભૂલો કરેલી છે.