અદૃશ્ય પ્રદૂષણને સમજો, ચેતો..તેનાથી બચવાના ઉપાય

રસોઈ બનાવવા માટે આપણે ગેસનો ઉપયોગ કરીએ તેમાંથી કાર્બન ડાયોક્સાઇડ ઉત્પન્ન થાય છે, જે રસોડાની હવાને ખૂબ જ પ્રદૂષિત કરી નાખે છે

- ધનંજય રાવલ

શું તમે સવારે વહેલા ઊઠીને ચાલવા જાવ છો? રસોડાના અદશ્ય પ્રદૂષણમાં તમે કામ કરો છો? જો આનો જવાબ હા હોય તો આ લેખ વાંચવો જોઈએ.

નાસાના ગોડાર્ડ ફ્લાઇટ સેન્ટરના એરોસોલ રિમોટ સેન્સિંગના વૈજ્ઞાનિકોએ સેટેલાઇટ તસવીરો શેઅર કરી છે. તેમાં ગાઢ ધુમ્મસનાં કારણો પણ જણાવ્યાં છે. ધુમ્મસનું પ્રમાણ સતત વધી રહ્યું છે. થર્મલ ઇનવર્ઝનને કારણે ધુમ્મસ છવાય છે. નાસાના વૈજ્ઞાનિકોએ જણાવ્યું છે કે ગરમ હવાની પરત જમીન પર ઠંડી હવા પર ઊઠી જતી હોય છે. ઠંડી હવા નીચે ઠરતી જાય છે. થર્મલ ઇનવર્ઝન જેટલું મજબૂત તેટલા વધુ પ્રમાણમાં પ્રદૂષક બાઉન્ડ્રી નજીક આવતી રહે છે. આ પ્રદૂષણને બહાર નીકળવાની કોઈ જગ્યા રહેતી નથી. રાત્રે તાપમાન જેમ-જેમ નીચું જાય તેમ-તેમ આ પરત ખૂબ જ નીચે આવી જાય છે. સવાર સુધીમાં તો આ પ્રદૂષણ જમીનની નીચી સપાટીએ ખૂબ જ વધારે હોય છે. આ ક્રિયા જ્યાં ધુમ્મસ ન હોય ત્યાં પણ થાય છે.