દ્રૌપદી મુર્મુ: ભણવાની જીદ લઈ ગઈ રાષ્ટ્રપ્રમુખના પદ સુધી

અંગત જીવનની એક પછી એક કરુણાંતિકા અને રાજકારણના મુશ્કેલ દાવપેચ વચ્ચે જનપ્રતિનિધિ તરીકે અસાધારણ કામગીરીએ કેવી રીતે એક આદિવાસી લોકનાયિકાને દેશના સર્વોચ્ચ હોદ્દે પહોંચાડ્યાં?

- ઉમંગ વોરા

ગયા મહિને ભારતીય જનતા પાર્ટીના અધ્યક્ષ જે.પી. નડ્ડાએ ઝારખંડનાં ભૂતપૂર્વ ગવર્નર દ્રૌપદી મુર્મુનું નામ રાષ્ટ્રપતિપદના ઉમેદવાર તરીકે જાહેર કર્યું. બીજા જ દિવસથી ૬૪ વર્ષનાં દ્રૌપદીજીના ઓરિસ્સાના રાયરંગપુરના ઘરે સુરક્ષાજવાનોની સંખ્યા વધારી દેવામાં આવી.

જો કે અભિનંદન આપવા આવી રહેલા સમર્થકો-મિત્રો-શુભેચ્છકોનાં ટોળાંઓથી દ્રોપદીજીને દૂર રાખવામાં સુરક્ષાજવાનોને સફળતા નહોતી મળી રહી. ગાર્ડ સમજાવતા હતા કે તમે હવે રાષ્ટ્રપતિ થવાનાં છો એટલે આમ ગમે એટલા લોકોને મળવું સુરક્ષિત નથી. તમારે મર્યાદિત લોકોને જ મળવું જોઈએ.

- પણ દ્રોપદીજીનો જવાબ હતોઃ ‘આ બધા મારા લોકો છે. આ પદ માટે હું એમની જ ઋણી છું.’ અલબત્ત, આ પહેલી વાર નહોતું કે દ્રૌપદી મુર્મુએ બધાને આશ્ચર્યમાં મૂકી દીધા હોય.

દ્રૌપદીજી દેશનાં પ્રથમ આદિવાસી રાષ્ટ્રપતિ અને બીજાં મહિલા બન્યાં છે. ૬૪ વર્ષની ઉંમરે રાષ્ટ્રપ્રમુખપદ ગ્રહણ કરનારાં અત્યાર સુધીનાં એ સૌથી ઓછી ઉંમરનાં વ્યક્તિ છે. આવી અપૂર્વ સિદ્ધિ સાથે રાષ્ટ્રપતિપદ શોભાવનારાં આ સન્નારીનું જીવન સંઘર્ષથી સિદ્ધિનું જીવંત ઉદાહરણ છે.

ઓરિસ્સાના આદિવાસી જિલ્લા મયુરભંજના ઉપરબેડા ગામમાં સાંથાલપરિવારના વડીલો સરપંચ રહી ચૂકેલા. સાંથાલ વડીલ બિરંચિ નારાયણ ટુરૂના ઘરે ૧૯૫૮માં જન્મેલી દીકરીએ સ્કૂલ પૂરી થતાં જ કૉલેજ જવાની જીદ લીધી. ઝૂંપડા જેવું ઘર, પારાવાર ગરીબી અને અભાવમાં જીવતા પરિવારે એ સમયે તો કૉલેજશિક્ષણની કલ્પના પણ નહોતી કરી. જો કે દીકરીને ભણાવવા પિતા એક ધારાસભ્ય પાસે પહોંચ્યા અને શરૂ થઈ એક અભૂતપૂર્વ સફર. સિત્તેરના દાયકામાં ભુવનેશ્વર જઈને ભણનારી પોતાના ગામની પહેલી યુવતી બિરંચિ નારાયણની એ દીકરી બની, દ્રૌપદી મુર્મુ.

વધામણાં: રાષ્ટ્રપ્રમુખ તરીકે દ્રૌપદી મુર્મુએ શપથ લીધા પછી એમના ઓડિશા (ઓરિસ્સા)ના ગામમાં જામ્યો જલ્લોષનો માહોલ.