ખૂબસૂરત યુરોપને દુઃસ્વપ્ન બનાવતી અગ્નિવર્ષા

બ્રિટનમાં એક બાજુ રાજકીય અસ્થિરતા તો બીજી બાજુ ગરમી. યુરોપમાં યુક્રેન-રશિયાના યુદ્ધની ગરમી તો બીજી બાજુ આકાશમાંથી વરસતા અગનગોળા જેવી ગરમી. પૃથ્વીના ઉત્તરીય ગોળાર્ધમાં આકાશમાંથી જાણે આગ વરસી રહી છે. સૌથી વધુ ગરમી ક્યારે ને કેટલી પડેલી એનો ઈતિહાસ ફરીથી લખવો પડશે એ જાણી અહીંના નિષ્ણાતોને પરસેવા છૂટી રહ્યા છે, ખરા અર્થમાં. અમેરિકા-યુરોપનાં આ ગરમ મોજાં આખી દુનિયા માટે આંખ ઉઘાડનારાં છે.

- કેતન મિસ્ત્રી (મુંબઈ)

યુરોપ, અમેરિકા જેવા દેશોનો ઉનાળો એટલે આપણા માટે એટલે કે ભારતીય પ્રવાસીઓ માટે બ્રાઈટ, સની ડેઝ. ત્યાં ફરવા જવાની મસ્ત સીઝન. ગરમ કપડાં લઈ જવાની માથાકૂટ નહીં. એયને મોજથી ટી-શર્ટ અથવા હળવા રંગનાં લિનન શર્ટ્સ, થ્રી-ફોર્થ પૅન્ટ્સ, માથા પર કૅપ, આંખો પર અલ્ટ્રા વાયોલેટ કિરણોથી બચાવતા ગૉગલ્સ પહેરીને ફરો. સ્વિમિંગ કૉસ્ચ્યુમ્સ, બિકિની પહેરીને દરિયામાં, હોટેલના સ્વિમિંગ પૂલમાં મજા કરો. ટુર પર ન જનારાઓ આવી મોજમસ્તી, ખાસ કરીને યુરોપના દેશોમાં મોજમસ્તી કરી રહેલા લોકોના ફોટા છાપાંમાં જુવે, પણ હાલ તો મામલો આખો જુદો છે. આજકાલ યુરોપિયનોને કુદરતી આગ રીતસરની શેકી રહી છે.

યુકેમાં બેડફોર્ડશાયરના એક સ્ટેશનના સિગ્નલ પર ગરમીનો પ્રકોપઃ સિગ્નલ પીગળ્યા તથા પાટા પર એ અસર પડી કે મુસાફરી અમુક કિલોમીટર લાંબી થઈ ગઈ.

કેમ કે હાલ યુરોપના અનેક દેશોમાં કાળઝાળ ગરમી છે, લોકો બટાકાની જેમ બફાઈ રહ્યા છે. અકળાવતા-પિગળાવતા ઉનાળાએ અમેરિકાના અમુક વિસ્તારોથી લઈને બ્રિટન સુધીની પ્રજા ને સત્તાવાળાઓના પરસેવા પાડી મૂક્યા છે. યુરોપના ખાસ કરીને ફ્રાન્સ, ગ્રીસ, પોર્ટુગલ, બ્રિટન, વગેરે દેશોમાં પારો ૪૦ ડિગ્રીને પાર કરી ગયો. ગરમી સહન કરી ન શકનારા ૨૦૦૦થી વધુનાં મોત થયાં છે. આપણે ત્યાં તાપમાન ૪૦-૪૫ ડિગ્રી સેલ્સિયસ સુધી પહોંચે એ સામાન્ય ગણાય છે, પરંતુ યુરોપ-અમેરિકામાં આટલી ગરમી ભાગ્યે જ પડે છે એટલે ત્યાંની પ્રજા એ સહન કરવા ટેવાયેલી નથી.