નારીને લાગ્યો રે... દારૂની કમાણીનો નશો

બોટાદના લઠ્ઠાકાંડમાં અત્યાર સુધીમાં પચાસથી વધુનાં મોત થયાં તથા પચાસથી વધુ લોકો હજી સારવાર હેઠળ છે ત્યારે ગુજરાતમાં દારૂના ધંધામાં સ્ત્રીઓનું આધિપત્ય પણ સામે આવ્યું છે. અમુક પછાત વર્ગની સ્ત્રીઓ સંજોગના નામે દારૂના ધંધાના રવાડે ચડીને તગડી કમાણી કરે છે. એ કમાણીથી કદાચ કિસ્મત બદલાય, કલંક દૂર થાય નહીં. કમાણીના શૉર્ટ કટમાં ફસાયેલી લેડી બુટલેગરોની કથની આંખ ઉઘાડનારી છે.

- મહેશ શાહ (અમદાવાદ)

થોડા દિવસ પહેલાંના બહુચર્ચિત બોટાદ લઠ્ઠાકાંડ સંદર્ભે ગુજરાત પોલીસે પંદર આરોપી સામે હત્યા સહિતની ગંભીર કલમ લગાવી એમને પકડ્યા છે. એમાં એક નામ છે બોટાદ જિલ્લાના રોજીદ ગામની ગજુ વડદરિયા. એ પછી અમદાવાદમાં પોલીસે લીલા રાજપૂતને દારૂની બૉટલો સાથે પકડી.

ગજુ અને લીલાની જેમ થોડાં બીજાં નામ છે... હંસા ઠાકોર, વિમળા ચુનારા, દમુ ચુનારા, માલા છારા, આશા ગુરખા, ઉષા પાંડે, જયસ્વાલબાઈ, નસીમ, રશીદા, વગેરે. ગુજરાત પોલીસના એક વરિષ્ઠ અધિકારીએ ચિત્રલેખાને આપેલી માહિતી પ્રમાણે, આ તમામ સ્ત્રી દારૂનો ધંધો કરે છે. મતલબ કે બુટલેગર છે.

જમીનમાં આ રીતે દાટેલા પીપડામાંથી બને દારૂની પોટલી. એની હેરફેરમાં ઘણી મહિલા પણ સંડોવાયેલી છે.

ગુજરાતમાં, ખાસ તો અમદાવાદમાં દારૂના ધંધામાં પુરુષોની જેમ અમુક મહિલાઓનું પણ મોટું નામ છે. બહુધા મહિલાઓ દેશી દારૂનું વેચાણ અને હેરાફેરી કરે છે, અમુક સ્ત્રીઓ દેશી દારૂ ગાળે, જ્યારે જૂજ યુવતીઓ વિદેશી દારૂનું વેચાણ કે હેરાફેરી પણ કરે છે. જાણકારોનાં અનુમાન મુજબ માત્ર અમદાવાદમાં જ છસ્સોથી વધુ મહિલા દેશી દારૂનો ધંધો કરે છે.

- અને ગુજરાતમાં લેડી બુટલેગરોની વાત નીકળે એમાં ભાભીનું નામ ન બોલાય તો જ નવાઈ. ૧૯૭૦-૧૯૮૦ના દાયકામાં અમદાવાદના દૂધેશ્વર વિસ્તારમાં ભાભી તરીકે નામચીન સકીનાબાનુ મિયાણા દેશી દારૂ વેચતી. સકીનાના દારૂવેચાણની જગા ભાભીનો અડ્ડો તરીકે જાણીતી હતી. હજી થોડાં વર્ષ પહેલાં જ સકીના મિયાણા ઉર્ફે ભાભીએ આ પત્રકારને એક મુલાકાતમાં કહ્યું હતું: ‘મારા સસરા અને પતિની જેમ હું દારૂનો ધંધો કરું છું, પણ દારૂના ગ્લાસમાં અમે પાણી સુદ્ધાં પીતાં નથી!’