એક કમકમાટીભર્યા ગુનાની ફેમિલી મેટર

પૈસા, સંપત્તિ, લગ્નેતર સંબંધ, બેવડી હત્યા.. સંબંધનાં બદલાતાં સમીકરણ જ્યારે નિર્મમ હત્યા તરફ દોરી જાય ત્યારે એ ગુનાનો વિષય તો બને જ છે, સાથે સાથે પારિવારિક બાબત પણ ગણાય છે, કેમ કે એમાં એકસાથે અનેક પરિવાર સંકળાયેલા હોય છે.

- કેતન મિસ્ત્રી

ઈરાકના સદામ હુસૈન, દિલ્હીના વેપારી વરુણ અરોરા અને મુંબઈનાં ગૃહિણી કાજલ તથા એમના પ્રેમી હિતેશ વચ્ચે શું સમાનતા હોઈ શકે? કોઈ હિંદી પિક્ચરની સ્ટોરીને આંટી દે એવી આ સત્ય ઘટનાનો આરંભ થાય છે મુંબઈના સુખી-સંપન્ન પરિવારના ઘરમાં. નાયિકા (કે ખલનાયિકા) કાજલ શાહ ફિલ્મ જેવાં કલરફુલ, પણ ઘાતક સપનાં જુએ છેઃ

પતિ અને સાસુ હંમેશ માટે આ જગતમાંથી જતાં રહે એટલે કુટુંબની સઘળી મિલકત એની (કાજલની). પછી એયને પ્રેમી હિતેશ સાથે જીવનભર.. હા, આ કરુણ કથાનાં ચાર મુખ્ય પાત્રોઃ કાજલ (૪૬), એના પતિ, ગાર્મેન્ટના વેપારી કમલકાંત (૪૬), કાજલનો કહેવાતો પ્રેમી હિતેશ (૪૫) અને કમલકાંતનાં મમ્મી સરલા દેવી (૬૫). પાંચ ડિસેમ્બર, ૨૦૨૨ના રોજ હચમચાવી દેતી આ ઘટનાના સમાચાર મુંબઈનાં અખબારોમાં ચમકે છેઃ મુંબઈની ગૃહિણી કાજલ શાહે પ્રેમી સાથે મળીને પતિની હત્યા કરી..

કહે છે કે મન, મોતી ને કાચ એક વાર તૂટે પછી સંધાતાં નથી. જેને સાંધવાની કે રેણ કરવાની જોગવાઈ નથી એવા અમુક સંબંધ ભાંગે પછી લગી હૈ ચોટ કલેજે પે ઉમ્રભર કે લિયે ગાવા સિવાય બીજો કોઈ વિકલ્પ બચતો નથી. શાહપતી સાથે પણ કંઈ આવું જ થયેલું. બેએક વર્ષ પહેલાં પતિ-પત્ની વચ્ચે અમુક બાબતસર ખટરાગ થયેલો ને પત્ની કાજલ પિયર સુરત જતી રહેલી. આ વર્ષે મન સંધાયાં (કે કમલકાંતને મન સંધાયાનો આભાસ થયો હશે) એટલે એ મુંબઈ પરત ફરી. પોલીસના જણાવ્યા મુજબ, આ જ વર્ષના જૂનમાં એણે હિતેશ સાથે મળીને એક પ્લાન બનાવ્યો. પતિના ખાવા-પીવામાં દરરોજ ધીમું ઝેર ભેળવી એને ખતમ કરવો.

આ પ્લાન બનાવવા કાજલ-હિતેશ ઈન્ટરનેટ પર ખોજ કરી રહ્યાં હતાં ત્યારે એમને દિલ્હીના બિઝનેસમૅન વરુણે જે રીતે એનાં સાસુ-સાળીની હત્યા કરી એનો લેખ વાંચવામાં આવ્યો. સાસુ-સાળીની હત્યા કરનારા વરુણે પોતાની કબૂલાતમાં કહેલું કે એનો પ્રેરણાસ્રોત હતો સદામ હુસૈન. ઈરાકનો હુકમશાહ સદામ હુસૈન પોતાના વિરોધી, દુશ્મનને આર્સેનિકથેલિયમ નામનું સ્લો પોઈઝન તરીકે ઓળખાતું રસાયણ પિવડાવીને મારી નાખતો.