રાઈનો પહાડ ના કરવો...

મોટા સુખની નાની ચાવી શાંતિનો આધાર તમારી પાસે વિકલ્પ પસંદ કરવાની અને આસપાસની સ્થિતિને નિયંત્રિત કરવાની કેટલી સ્વતંત્રતા છે એના પર છે. હું કયા સંઘર્ષનો સ્વીકાર કરું અને કઈ માથાકૂટને દૂર રાખું એ નક્કી કરવાની છૂટ હોય એ મારી શાંતિ માટેની પૂર્વશરત છે. જે સંઘર્ષ સાર્થક છે એ શાંતિનો અનુભવ કરાવે. જે સંઘર્ષ નિરર્થક છે એ અશાંતિ આપે.

- રાજ ગોસ્વામી

રેગનની બુશને સલાહ...

અમેરિકાના ૪૦મા રાષ્ટ્રપતિ રોનાલ્ડ રેગન વ્હાઈટ હાઉસ છોડીને ગયા ત્યારે એમના અનુગામી અને ઉપરાષ્ટ્રપતિ જ્યોર્જ બુશ માટે એક સલાહ મૂકીને ગયા હતા. બુશે ખુરસી સંભાળી પછી એક દિવસ એમણે એ ટેબલનું ખાનું ખોલ્યું, જેનો ઉપયોગ રેગન પણ કરતા હતા. એમાં એક નોટપેડ પર રેગને પોતાના હસ્તાક્ષરમાં નોંધ લખી હતી. બુશે કહ્યું હતું કે એ નોંધ સુંદર અને ઉષ્માભરી હતી.

રેગને એના પર લખ્યું હતુંઃ ડિયર જ્યોર્જ, તમને પણ આ સ્ટેશનરીનો ઉપયોગ કરવાનો અવસર આવશે. ચોક્કસ કરજો.

બુશે પૅડનાં પાનાં ફેરવ્યાં તો દરેક પાનાં પર મરઘી જેવાં દેખાતાં ટર્કી પક્ષીઓનું ટોળું એક હાથીને જમીન પર પાડી દેવા મથી રહ્યું હતું. ચિત્રની સાથે એક સંદેશો હતોઃ Don't let the turkeys get you down (ટર્કીઓથી હાર ન માનતા).

રેગન અને બુશની રિપબ્લિકન પાર્ટીનું ચૂંટણીચિહ્ન હાથી છે એટલે એ સંદેશો રાજકીય રીતે પ્રતીકાત્મક પણ હતો. એનો વ્યાપક અર્થ એવો થતો હતો કે જીવનમાં આપણી આસપાસ એવા ઘણા લોકો હોય છે, ચાહે પરિવારજનો હોય, મિત્રો હોય, સહકાર્યકરો હોય, પ્રતિસ્પર્ધીઓ હોય, જે તમને તમારું લક્ષ્ય હાંસલ કરવામાં નડતા હોય છે. ન તો એવા લોકોની ચિંતા કરવી જોઈએ કે ન તો એમને કારણે લક્ષ્યમાંથી ચલિત થઈ જવું જોઈએ.

***

થોડા દિવસ પહેલાં કૌન બનેગા કરોડપતિમાં ગરમ સીટ પર બે શાનદાર ગાયકો, સોનુ નિગમ અને શ્રેયા ઘોષાલ હતાં. એમાં હોસ્ટ અમિતાભ બચ્ચન તરફથી એક પ્રશ્ન આવ્યો હતો. એમણે એક અંગ્રેજી સેલ્ફ-હેલ્પ પુસ્તકનું અધૂરું ટાઈટલ પેશ કર્યું હતું અને જવાબમાં એનું આખું નામ આપવાનું હતું. ટાઈટલ હતું: Don't Sweat the શ્રેયા ખાલી જગ્યામાં શું હશે એને લઈને થોડી ગૂંચવાઈ ગઈ, પણ સોનુએ પૂરા આત્મવિશ્વાસ સાથે પુસ્તકનું આખું નામ કહ્યું: Don't Sweat the Small Stuff... and It's All Small Stuff. એનું કારણ એ હતું કે સોનુની અંગત લાઈબ્રેરીમાં આ પુસ્તક હતું અને એણે એ વાંચ્યું હતું. એટલું જ નહીં, એ પુસ્તકની એના જીવન પર ગહેરી અસર પડી હતી.