મોડર્ન ટેક્નોલોજી ને ખંતનાં વાવેતરથી લડ્યો સહળતાનો મબલક પાક

આજની યુવાપેઢી ખેતીથી દૂર ભાગી રહી છે. પરિવારનાં ખેતર સંભાળવા કોઈ જ ન હોય એવાં અનેક કુટુંબ છે ત્યારે રાજકોટની એક સ્ત્રી પચાસ વીઘાંની ખેતી સંભાળીને આજની પેઢીને નવી દિશા બતાવી રહી છે.

- દેવેન્દ્ર જાની

રાજકોટથી આશરે ૩૦ કિલોમીટર દૂર આવેલું દોમડા ગામ. વહેલી સવારે અહીંના એક ખેતર પર સૂર્યનાં કિરણ હજી તો માંડ રેલાયાં છે ત્યાં જાતે ગાડી ચલાવીને એક મહિલા આવી પહોંચે છે. વિશાળ ખેતરમાં આંટો મારતી એ મજૂરોને ધડાધડ આદેશ આપે છે. આપેલા આદેશનું પાલન થાય છે એની ખાતરી કરી એ પાકના છોડ બરાબર ઊગી રહ્યા છે કે નહીં, પાકને કોઈ રોગ તો નથી લાગી ગયો ને, એને દવા કે ખાતરની જરૂર છે કે નહીં એ બધું ચકાસી પોતાનાં કામે લાગે છે.

ખેડૂતસમાજની આજની પેઢી જ્યારે ખેતીથી દૂર ભાગી રહી છે ત્યારે એક દીકરીને ખંતથી ખેતી કરતી જોઈને ઘણાને નવાઈ લાગે છે. અમુક લોકો એને લેડી ફાર્મરના નામથી ઓળખે છે. નામઃ સોનલ રાબડિયા.

હજી ત્રણેક મહિના પહેલાં કૌન બનેગા કરોડપતિના એપિસોડમાં સૌરાષ્ટ્રનાં જ એક ખેડુપુત્રી જયાબહેન ઓડેદરા હૉટ સીટ પર આવ્યાં હતાં. ગ્રેજ્યુએશનમાંથી બ્રેક લઈને એમણે ઑર્ગેનિક ફાર્મિંગમાં રસ લેવાની શરૂઆત કરી. આજે એ લગનથી ખેતકામ કરી રહ્યાં છે. એમને ખેતરમાં ટ્રૅક્ટર ચલાવતાં જોઈને નવાઈ પામેલા અમિતાભ બચ્ચનને જયાબહેને કહ્યું કે આમાં કંઈ મોટી વાત નથી. કંઈ આવી જ કથા સોનલ રાબડિયાની છે.

રાજકોટના કાલાવડ રોડ પર રહેતો રાબડિયાપરિવાર ખેતકામ કરીને સુખેથી પોતાનું ગુજરાન ચલાવે છે. કુટુંબના મોભી પ્રવીણભાઈ કેન્દ્ર સરકારની કચેરીમાં અધિકારી અને સાથે ખેતકામ પણ કરે. રોજ ધૂડિયા-દોમડા ગામે આવેલી વાડીએ જાય. અલગ અલગ ચારેક જગ્યાએ મળીને એમની આશરે પચાસ વીઘાં જમીન. સંતાનમાં બે પુત્રી અને એક પુત્ર. સોનલ નાની હતી ત્યારે પિતા સાથે ખેતરે જતી, પરંતુ એ ઉંમરે મન ખેતીમાં લાગતું નહીં. એને તો ભરતગૂંથણ અને હસ્તકળા કારીગરીમાં રુચિ હતી. એ તો ખેતરમાં વૃક્ષ તળે બેસીને ગૂંથ્યા કરે.