શૅરબજારને વિદેશી રોકાણ પણ જોઈએ જ છે...

આમ તો નિયમન સંસ્થાએ શૅરબજારની મંદીની-કડાકાની ચિંતા કરવાની ન હોય અને તેજીનાં ગાણાં પણ ગાવાનાં ન હોય, જો કે હમણાં ભારતીય શૅરબજારમાં વિદેશી રોકાણકારો દ્વારા જે આક્રમક વેચાણ થતું રહ્યું અને જેને પગલે ભારે કરેક્શનનો દૌર ચાલ્યો એને ધ્યાનમાં રાખીને તાજેતરમાં ‘સેબી’ના નવા અધ્યક્ષ તુહિન પાંડેએ માર્કેટ, ઈકોનોમી અને રોકાણકારોના વિષયમાં કરેલાં નિવેદનોના સંકેત અને સાર સમજવા જોઈએ.

- જયેશ ચિતલિયા

સેબીના નવા ચૅરમૅન તુહિન કાંતા પાંડે સામે એમના આગમન સાથે જ શૅરબજારના ગંભીર કડાકાનો બહુ મોટો પડકાર આવ્યો છે.
રોકાણકારોનો બહુ મોટો વર્ગ અત્યારે નિરાશામાં ધકેલાઈ ગયો છે અને વિશ્વાસની કટોકટીનો સામનો કરી રહ્યો છે. એ દૃષ્ટિએ નવા સેબી અધ્યક્ષનું હમણાંનું નિવેદન મહત્ત્વનું ગણાય.

‘ભારત જે ઝડપી ગતિએ વિકાસ કરવાની ઈચ્છા ધરાવે છે એને માટે આપણને સ્થાનિક અને વિદેશી ઈન્વેસ્ટર્સના સાતત્યપૂર્ણ અને લાંબા ગાળાના રોકાણપ્રવાહની ખાસ જરૂર છે. આ દિશામાં આપણે રોકાણ માટેનાં ધોરણો વધુ હળવાં અને વ્યવહારું બનાવવાં પડશે...'

આ શબ્દો મૂડીબજારની નિયમન સંસ્થા સેબી (સિક્યોરિટીઝ ઍન્ડ એક્સચેન્જ બોર્ડ ઑફ ઈન્ડિયા)ના નવા ચૅરમૅન તુહિન કાંતા પાંડેએ ઉચ્ચાર્યા બાદ એ માર્કેટ અને કૉર્પોરેટ સેક્ટરમાં ચર્ચાનો વિષય બન્યા છે, કારણ કે આ નિવેદનમાં નજીકના ભવિષ્યમાં સેબી તરફથી યા સરકાર તરફથી વિદેશી રોકાણ માટેનાં નીતિનિયમો, ધોરણો હળવાં બનવાના સ્પષ્ટ સંકેત છે.