முதல்வர் சாலை மேம்பாட்டு திட்டத்தின் கீழ் 4 வழிச்சாலையாக மாறும் செவிலிமேடு - கீழம்பி புறவழிச்சாலை

விறுவிறுப்பாக வேலை நடைபெறுவதால் பொதுமக்கள் மகிழ்ச்சி

- 

காஞ்சிபுரம் அருகே செவிலிமேடு முதல் கீழம்பி வரை உள்ள புறவழிச்சாலை முதல்வர் சாலை மேம்பாட்டு திட்டத்தின் கீழ் 4 வழிச்சாலையாக மாற்றம் செய்யப்படும் பணிகள் துரிதமாக நடைபெறுவதால் பொதுமக்கள் மகிழ்ச்சி அடைந்துள்ளனர்.

புராதன நகரமான காஞ்சிபுரத்தில் பிரசித்தி பெற்ற கோயில்கள் அதிகம் உள்ளதால் வெளியூர், வெளி மாவட்டங்கள் மட்டுமல்லாது வெளி மாநிலங்கள், வெளி நாடுகளில் இருந்தும் ஏராளமான பக்தர்கள் காஞ்சிபுரம் வந்து செல்கின்றனர். மேலும், உலகப் பிரசித்தி பெற்ற காஞ்சிப் பட்டு சேலை வாங்க கர்நாடகா, தெலுங்கானா, ஆந்திரா உள்ளிட்ட மாநிலங்களில் இருந்து ஏராளமானோர் காஞ்சிபுரம் வந்து செல்கின்றனர்.

மேலும், தேரோடும் வீதிகளில் மேம்பாலங்கள் அமைக்க முடியாத நெருக்கடி உள்ளதால், காஞ்சிபுரத்தின் முக்கிய சாலைகளில் எப்போதும் அதிக போக்குவரத்து இருக்கும். எனவே, போக்குவரத்து நெருக்கடியை சமாளிக்க கடந்த திமுக ஆட்சி காலத்தில் காஞ்சிபுரம் அருகே செவிலிமேடு பகுதியில் இருந்து சென்னை – பெங்களூரு தேசிய நெடுஞ்சாலையை இணைக்கும் வகையில், கீழம்பி புறவழிச்சாலை அமைக்கப்பட்டது.