9.2 டிஎம்சி தண்ணீரை காவிரியில் கர்நாடகம் திறந்துவிட வேண்டும்

மத்திய அமைச்சரிடம் துரைமுருகன் நேரில் வலியுறுத்தல்

நமது சிறப்பு நிருபர் புது தில்லி ஜூலை 5: காவிரியில் தமிழகத்துக்கு ஜூன் மற்றும் ஜூலை 3 -ஆம் தேதி வரையில் வழங்க வேண்டிய 9.2 டிஎம்சி தண்ணீரை உடனே திறந்துவிட கர்நாடகத்தை வலியுறுத்த வேண்டும் என, மத்திய ஜல்சக்தித் துறை அமைச்சர் கஜேந்திர சிங் ஷெகாவத்தை தமிழக நீர்வளத் துறை அமைச்சர் துரைமுருகன் புதன்கிழமை நேரில் சந்தித்து கோரிக்கை விடுத்தார்.

காவிரியில் கர்நாடக அணையிலிருந்து வரவேண்டிய நீர்வரத்தில் தடை ஏற்பட்டு மேட்டூர் அணையின் நீர்மட்டம் 85.97 அடியாகக் குறைந்துள்ளது. அணையின் நீர் இருப்பு 48 டிஎம்சியாக இருக்கும் நிலையில், காவிரி நீர்ப்பாசனத்துக்கான தண்ணீர் பற்றாக்குறையாகும் நிலை ஏற்பட்டுள்ளது.

குறிப்பாக கேரளம், கர்நாடக காவிரி நீர்பிடிப்புப் பகுதியில் கடந்த ஜூன் மாதம் சுமார் 50 முதல் 60 சதவீத மழை (பற்றாக்குறை) பொய்த்துவிட்டதன் காரணமாக கர்நாடகம் அணைகளில் தண்ணீர் இருப்பு குறைந்துள்ளது.