ராஜஸ்தான் தேர்தல் பிரசாரத்தில் பெண் தலைவர்களை ஈடுபடுத்தும் பாஜக

உதய்பூர்: ராஜஸ்தான் சட்டப் பேரவைத் தேர்தலில் வெற்றி பெற பெண்களின் நலன் சார்ந்த திட்டங்களை முன்வைத்து காங்கிரஸ் பிரசாரம் செய்து வரும் நிலையில், அங்கு பிரசாரம் செய்வதில் பல்வேறு மாநிலங்களைச் சேர்ந்த தனது பெண் தலைவர்களை பாஜக ஈடுபடுத்தியுள்ளது.

ராஜஸ்தானில் வரும் 25}ஆம் தேதி சட்டப் பேரவைத் தேர்தல் நடைபெற உள்ளது. இத்தேர்தலுக்கான பிரசாரத்தில் பாஜகவின் மாநில மகளிர் அணியைச் சேர்ந்தவர்கள் தீவிரமாக ஈடுபட்டுள்ளனர். இவர்களைத் தவிர குஜராத், உத்தர பிரதேசம், ஹரியாணா, உத்தரகண்ட், தில்லி, ஜம்மு}காஷ்மீர் ஆகிய மாநிலங்களைச் சேர்ந்த பாஜக மகளிர் அணியினர் ராஜஸ்தானில் பிரசாரம் செய்து வருகின்றனர். மோடி அரசின் திட்டங்கள் குறித்து எடுத்துக் கூறி அவர்கள் வாக்கு சேகரித்து வருகின்றனர்.

பாஜக மகளிர் அணியின் தேசிய பொதுச் செயலராக உள்ள தீப்தி ராவத் பரத்வாஜ், ராஜஸ்தான் சட்டப் பேரவைத் தேர்தலில் அந்த மாநில மகளிர் அணிக்கான மேலிடப் பொறுப்பாளராக நியமிக்கப்பட்டுள்ளார். இது தொடர்பாக அவர் கூறியதாவது: 

பெண்களின் வாக்குகள் பாஜகவுக்கு கிடைக்கச் செய்வதற்கு ஓர் உத்தி வகுக்கப்பட்டுள்ளது. இந்த மாநிலத்தில் பாஜக மகளிர் அணி தீவிரமாகச் செயல்பட்டு வருகிறது. ஆனால் தேர்தல் காரணமாக அவர்களுக்கு அதிக நெருக்கடி ஏற்பட்டுள்ளது.