தீபாவளி விடுமுறை நிறைவு: 4,000 சிறப்புப் பேருந்துகளில் சென்னை திரும்பும் மக்கள்

தீபாவளி பண்டிகை விடுமுறை முடிவடைந்த நிலையில், 4,000 சிறப்பு பேருந்துகளில் சொந்த ஊா்களிலிருந்து சென்னைக்கு பொதுமக்கள் திரும்பி வருகின்றனா்.

தீபாவளி பண்டிகையை கொண்டாட ரயில்கள், அரசு மற்றும் ஆம்னி பேருந்துகளில் சுமாா் 10 லட்சத்துக்கும் அதிகமானோா் தங்கள் சொந்த ஊா்களுக்கு பயணமாகியுள்ளனா்.

திபாவளி தினமான (ஞாயிற்றுக்கிழமை) தவிா்த்து, தமிழக அரசு சாா்பில் மாணவா்கள், பெற்றோா் நலன்கருதி திங்கள்கிழமை கூடுதலாக ஒரு நாள் விடுமுறை அறிவிக்கப்பட்டிருந்தது. அதன்படி, விடுமுறை முடிந்து பெரும்பாலானவா்கள் திங்கள்கிழமை இரவு சொந்த ஊா்களிலிருந்து புறப்பட்டு செவ்வாய்க்கிழமை காலையில் சென்னைக்கு வந்தனா்.

மற்றவா்கள் செவ்வாய் மாலை புறப்பட்டு புதன் காலையில் சென்னை வந்தடைவா்.

இதற்காக, தமிழகத்தின் பல்வேறு பகுதிகளிலிருந்து சென்னைக்கு தினமும் இயக்கப்படும் 2,100 பேருந்துகளுடன் கூடுதலாக 1,900 சிறப்பு பேருந்துகள் என மொத்தம் 4,000 பேருந்துகள் சென்னைக்கு இயக்கப்படுகின்றன.