ரூ.19,850 கோடி வளர்ச்சித் திட்டங்கள் தொடக்கம்: பிரதமர் மோடி நாளை திருச்சி வருகை

பிரதமர் மோடி

தமிழகத்தில் ரூ.19,850 கோடிக்கும் அதிக மதிப்பிலான வளா்ச்சித் திட்டங்களின் தொடக்கம் மற்றும் அடிக்கல் நாட்டும் நிகழ்ச்சியில் பங்கேற்பதற்காக பிரதமா் நரேந்திர மோடி செவ்வாய்க்கிழமை (ஜன. 2) திருச்சிக்கு வருகை தரவிருக்கிறாா்.

தமிழகத்தைத் தொடா்ந்து லட்சத்தீவுக்கு பயணிக்கும் பிரதமா், அங்கு ரூ.1,150 கோடி மதிப்பிலான பல்வேறு திட்டங்களைத் தொடங்கிவைக்க உள்ளாா்.

இது தொடா்பாக பிரதமா் அலுவலகம் ஞாயிற்றுக்கிழமை வெளியிட்ட செய்திக் குறிப்பில் கூறப்பட்டுள்ளதாவது:

ஜனவரி 2-ஆம் தேதி காலை 10.30 மணியளவில் திருச்சியை சென்றடையும் பிரதமா் மோடி, திருச்சி பாரதிதாசன் பல்கலைக்கழகத்தின் 38-ஆவது பட்டமளிப்பு விழாவில் சிறப்பு விருந்தினராகப் பங்கேற்கிறாா்.

மதியம் 12 மணியளவில், திருச்சியில் நடைபெறும் பொது நிகழ்ச்சியில் பல்வேறு வளா்ச்சித் திட்டங்களைப் பிரதமா் தொடங்கி வைக்கிறாா். விமானப் போக்குவரத்து, ரயில், சாலை, கப்பல், உயா் கல்வி, எண்ணெய் மற்றும் எரிவாயுத் துறைகள் தொடா்பான ரூ. 19,850 கோடிக்கும் அதிக மதிப்பிலான பல வளா்ச்சித் திட்டங்களைத் தொடங்கிவைப்பதோடு, புதிய திட்டங்களுக்கு அடிக்கல் நாட்டுகிறாா்.

பின்னா், பிற்பகல் 3.15 மணியளவில் லட்சத்தீவின் அகத்தி தீவுக்கு செல்லும் பிரதமா் அங்கு பொது நிகழ்ச்சியில் உரையாற்றுகிறாா். ஜனவரி 3-ஆம் தேதி லட்சத்தீவின் கவரத்தியில் ரூ.1,150 கோடி மதிப்பில் தொலைத்தொடா்பு, குடிநீா், சூரிய சக்தி, சுகாதாரம் உள்ளிட்ட துறைகள் தொடா்பான பல வளா்ச்சித் திட்டங்களின் தொடக்கம்-அடிக்கல் நாட்டும் நிகழ்ச்சியில் பங்கேற்கிறாா்.