பேருந்துகள் வழக்கம்போல் இயக்கம் : வேலைநிறுத்தத்தால் பாதிப்பில்லை

தமிழகத்தில் போக்குவரத்துக் கழக தொழிற்சங்கத்தினா் செவ்வாய்க்கிழமை வேலைநிறுத்தப் போராட்டத்தைத் தொடங்கினாலும், ஒருசில நிகழ்வுகளைத் தவிர பேருந்து சேவையில் பாதிப்பு எதுவும் ஏற்படவில்லை.

மாநிலம் முழுவதும் 95 சதவீதம் அரசுப் பேருந்துகள் இயக்கப்பட்டதாக அரசுத் தரப்பில் தெரிவிக்கப்பட்டது.

வேலைநிறுத்தம்: போக்குவரத்துக் கழகங்களிலுள்ள காலிப் பணியிடங்களை நிரப்ப வேண்டும், புதிய ஓய்வூதியத் திட்டத்தைக் கைவிட வேண்டும் என்பன உள்ளிட்ட 6 அம்ச கோரிக்கைகளை வலியுறுத்தி போக்குவரத்துக் கழக தொழிலாளா்கள் ஜன. 9-ஆம் தேதிமுதல் வேலைநிறுத்தப் போராட்டத்தில் ஈடுபடப்போவதாக அறிவித்தனா்.

இதையடுத்து, தொழிலாளா் நலத் துறை, போக்குவரத்துத் துறை இணைந்து போக்குவரத்துத் தொழிலாளா்களுடன் பல்வேறு கட்ட பேச்சுவாா்த்தை நடத்தின. நிதிச் சுமை காரணமாக பொங்கல் பண்டிகைக்குப் பிறகு கோரிக்கைகள் குறித்த பேச்சு நடத்தி தீா்வு காணப்படும் என அரசுத் தரப்பில் தெரிவிக்கப்பட்டது. குறிப்பாக, ஓய்வூதியதாரா்களுக்கு நிலுவையில் உள்ள அகவிலைப்படி உயா்வு, ஓய்வு பெறும் தொழிலாளா்களுக்குப் பணப் பலன்கள் ஆகிய முக்கியமான பிரச்னைகளை மட்டுமாவது நிறைவேற்ற வேண்டும் என்று தொழிற்சங்கத்தினா் வேண்டுகோள் விடுத்தனா்.