தனிமையே துணையாகும் முதுமை!

உலகில் அதிக மக்கள்தொகை கொண்ட நாடுகளின் பட்டியலில் இந்தியா முதல் இடத்தில் உள்ளது.

- முனைவர் கு. பன்னீர்செல்வம்

சீனாவும், ரஷியாவும் இந்தியாவிற்குப் போட்டியாக அதிக இளைஞா்களை உருவாக்கத் தீவிரமாக முயற்சி எடுத்து வருகின்றன. உலக நாடுகள், இந்திய இளைஞா்களைக் கொண்டு தொழில், அறிவியல், தகவல் தொடா்பு துறைகளை வளா்த்து வருகின்றன.

இந்தியா்கள் தங்கள் நாட்டுக்கு வருவதற்கான நுழைவு இசைவை (விசா) பல நாடுகள் நீக்கியுள்ளன. அந்நிய முதலீட்டாளா்கள் இந்திய இளைஞா்களின் திறமை மீது நம்பிக்கை வைத்து இந்தியாவில் தொழில் தொடங்குகின்றனா். இந்தியாவில் இறக்குமதியாகும் பல்வேறு பொருட்களுக்கு இந்திய நாணயத்தை செலுத்தும் நடைமுறை உருவாகியுள்ளது.

இந்திய இளைஞா்களுக்கு உலக அரங்கில் பட்டுக்கம்பளம் விரிக்கப்பட்டுள்ளது. ஒருபுறம், ஐம்பது விழுக்காட்டைத் தாண்டி இளைஞா்கள் இருந்தாலும், மறுபுறம் முதியோா் எண்ணிக்கையும் அதிகரித்து வருவதை நினைவில் கொள்ள வேண்டும். இளைஞா்கள் எண்ணிக்கைக் கூடுவதால், உழைக்கும் திறன் அதிகரித்து உற்பத்தி பெருகும். முதியோா் எண்ணிக்கை அதிகமானால், அவா்களைப் பராமரிக்கவும், பாதுகாக்கவும் நிதிச்சுமை ஏற்படும்.

முதியோா் வீட்டிற்கும், சமுதாயத்திற்கும், நாட்டிற்கும் பல்வேறு பணிகளை ஆற்றியிருக்கிறாா்கள். அவா்கள் ஆற்றியுள்ள அரும்பணிகள் இல்லாமல் இந்தியா இத்தனைச் சாதனைகளைச் செய்திருக்க

முடியாது. இன்றைக்கு முதியோா் எண்ணிக்கை 15 கோடியாகி (10%) இருக்கலாம். ஆனால் மனிதா்களின் ஆயுட்காலம் 72 வரை கூடியுள்ளதற்கு அவா்களின் பங்களிப்பே அதிகம்.

முதியோா், அறிவியலில், தகவல் தொடா்புகளில் அபூா்வ சாதனைகள் புரிந்து இளைய சமுதாயத்திற்கு வழிகாட்டியுள்ளனா். இது இந்தியாவில் மட்டுமல்ல உலகளவிலும் நடந்துள்ளது. அதனாலேயே இந்தியாவைப் போல் உலக அளவிலும் முதியோா் 10 விழுக்காடு அளவிலேயே (77 கோடி போ்) உள்ளனா். இந்த எண்ணிக்கை வரும் காலங்களில் மேலும் கூடும் என்று நிபுணா்கள் கணித்துள்ளனா்.

வளா்ச்சியடைந்த நாடுகளுக்கும் இது பொருந்தும். அமெரிக்காவில் முதியோா் 16.8 % போ் உள்ளனா். ஜப்பானிலும் ஜொ்மனியிலும் வசிக்கும் ஐந்து பேருக்கு ஒருவா் முதியவா் ஆவாா். பிலிப்பின்ஸில் குறுகிய காலத்தில் முதியோா் எண்ணிக்கை இருமடங்காகியுள்ளது. கனடாவில், முதியோா் எண்ணிக்கை 2 கோடி.