பாஜகவில் இணைந்தார் மகாராஷ்டிர முன்னாள் முதல்வர் அசோக் சவாண்

காங்கிரஸில் இருந்து விலகிய மகாராஷ்டிர முன்னாள் முதல்வர் அசோக் சவாண் பாஜகவில் செவ்வாய்க்கிழமை (பிப். 13) இணைந்தார்.

மகாராஷ்டிர முன்னாள் முதல்வரும் காங்கிரஸின் மூத்த தலைவர்களில் ஒருவருமான அசோக் சவாண், காங்கிரஸ் கட்சியில் இருந்து திங்கள்கிழமை விலகினார். அவர் மும்பையில் உள்ள பாஜக அலுவலகத்துக்கு செவ்வாய்க்கிழமை வந்தார். அங்கு அவரை துணை முதல்வர் தேவேந்திர ஃபட்னவீஸ் உள்ளிட்ட தலைவர்கள் வரவேற்றனர். அவர்களின் முன்னிலையில் அசோக் சவாண், பாஜகவில் இணைந்தார்.

சுமார் 40 ஆண்டுகள் காங்கிரஸில் இருந்த அவர் பாஜகவில் இணைந்தது குறித்து செய்தியாளர்கள் சந்திப்பில் கூறுகையில், "இன்று எனது புதிய அரசியல் பயணம் தொடங்குகிறது' என்றார்.

முன்னாள் மகாராஷ்டிர முதல்வரும் முன்னாள் மத்திய உள்துறை அமைச்சருமான எஸ்.பி.சவாணின் மகன் அசோக் சவாண் (65) ஆவார். தற்போது பாஜகவில் இணைந்துள்ள அவருக்கு மாநிலங்களவை எம்.பி. பதவி வழங்கப்படலாம் என்று ஊகச் செய்திகள் உலா வருகின்றன.