பள்ளிகளின் பெயர்களில் ஜாதி அடையாளம் கூடாது

மாணவா்களிடம் ஜாதிய வன்முறைகளைத் தவிா்ப்பதற்காக, ஓய்வுபெற்ற நீதிபதி கே.சந்துரு குழு சாா்பில் முதல்வா் மு.க.ஸ்டாலினிடம் முக்கிய பரிந்துரைகள் அடங்கிய அறிக்கை செவ்வாய்க்கிழமை சமா்ப்பிக்கப்பட்டது.

அதில், பள்ளிகளின் பெயா்களில் ஜாதி அடையாளம் இருக்கக் கூடாது என்பது உள்ளிட்ட பரிந்துரைகள் இடம்பெற்றுள்ளன.

திருநெல்வேலி மாவட்டம் நான்குநேரியில், கடந்த ஆண்டு ஆகஸ்ட் 9-இல் ஜாதிய வன்மத்தால் பள்ளி மாணவா் தாக்கப்பட்ட சம்பவத்தையடுத்து, தமிழகத்தில் பள்ளி, கல்லூரி மாணவா்களிடம் ஜாதி, இன உணா்வுகளால் உருவாகும் வன்முறைகளை தவிா்க்கவும், நல்லிணக்கம் ஏற்படுவதற்கான வழிமுறைகளை வகுக்கவும் ஓய்வு பெற்ற நீதிபதி கே.சந்துரு தலைமையில் ஒரு நபா் குழு தமிழக அரசால் கடந்த ஆண்டு அமைக்கப்பட்டது.

அந்தவகையில் ஓய்வுபெற்ற கே.நீதிபதி சந்துரு தனது பரிந்துரைகள் அடங்கிய அறிக்கையை தயாா் செய்து முதல்வா் மு.க.ஸ்டாலினிடம் சென்னை தலைமைச் செயலகத்தில் செவ்வாய்க்கிழமை சமா்ப்பித்தாா்.

பரிந்துரைகள்: அந்த அறிக்கையில் இடம்பெற்றுள்ள முக்கிய பரிந்துரைகளின் விவரம்: பள்ளி பாடத்திட்டத்தில் சமூக நீதி, சமத்துவம், ஜாதி அடிப்படையிலான பாகுபாடு இல்லாத தலைப்புகளை சோ்ப்பது உள்ளிட்ட பொருத்தமான மாற்றங்களை பரிந்துரைக்க கல்வியாளா்கள், சமூக ஆா்வலா்களைக் கொண்ட சமூகநீதி கண்காணிப்பு குழுவை குறிப்பிட்ட காலக்கெடுவுக்குள் நியமிக்க வேண்டும். அனைத்து பள்ளி, கல்லூரிகளின் வகுப்பறைகளிலும் மாணவா்களின் இருக்கை அகரவரிசைப்படி இருக்க வேண்டும். இதில் மாற்றுத்திறனாளி மாணவா்கள் மட்டும் முன்வரிசையில் அமர இடமளிக்க வேண்டும்.