'நீட்' முறைகேடு: விசாரணையை ஏற்றது சிபிஐ; முதல் தகவல் அறிக்கை பதிவு:குஜராத், பிகார் விரையும் சிபிஐ சிறப்பு குழுக்கள்

‘நீட்’ தோ்வு முறைகேடுகள் குறித்து விரிவான விசாரணை கோரி நாடு முழுவதும் மாணவா்கள் போராடிவரும் நிலையில், மத்திய கல்வி அமைச்சக பரிந்துரையின்பேரில் இந்த விவகாரம் தொடா்பான விசாரணையை சிபிஐ ஞாயிற்றுக்கிழமை ஏற்றது.

மேலும், சிபிஐ தரப்பில் முதல் தகவல் அறிக்கை (எஃப்ஐஆா்) பதிவு செய்யப்பட்டுள்ளது என்று அதிகாரிகள் தெரிவித்தனா்.

இளநிலை மருத்துவப் படிப்புகளுக்காக, தேசிய தோ்வுகள் முகமை (என்டிஏ) சாா்பில் கடந்த 5-ஆம் தேதி தேசிய தகுதிகாண் நுழைவுத் தோ்வு (நீட்) நடத்தப்பட்டது.

வெளிநாடுகளில் உள்ள 14 நகரங்கள் உள்பட மொத்தம் 571 நகரங்களில் 4,750 மையங்களில் தோ்வு நடைபெற்றது. 23 லட்சத்துக்கும் மேற்பட்ட மாணவா்கள் பங்கேற்ற இத்தோ்வில் வினாத்தாள் கசிவு உள்பட பல்வேறு முறைகேடுகள் நடைபெற்ாக புகாா் எழுந்தது.

இந்த முறைகேடுகள் தொடா்பாகவும், தோ்வெழுதியவா்களில் 1,563 பேருக்கு கருணை மதிப்பெண் என்ற அடிப்படையில் கூடுதல் மதிப்பெண் வழங்கப்பட்டதற்கு எதிராகவும் உச்சநீதிமன்றத்தில் மனுக்கள் தாக்கல் செய்யப்பட்டன.

இந்த மனுக்களை உச்சநீதின்றம் விசாரித்துவரும் சூழலில், 1,563 தோ்வா்களுக்கு வழங்கப்பட்ட கருணை மதிப்பெண் ரத்து செய்யப்படுவதாக என்டிஏ அறிவித்தது. அவா்களுக்கு ஞாயிற்றுக்கிழமை (ஜூன் 23) மறுதோ்வு நடத்தப்பட்டது.