சிவகாசி அருகே பட்டாசு ஆலையில் வெடி விபத்து: இருவர் உயிரிழப்பு

விருதுநகர் மாவட்டம், சிவகாசி அருகே பட்டாசு ஆலையில் செவ்வாய்க்கிழமை நிகழ்ந்த வெடி விபத்தில் 2 தொழிலாளர்கள் உயிரிழந்தனர். 2 பேர் பலத்த காயம்டைந்தனர்.

சிவகாசி அருகேயுள்ள காளையார் குறிச்சியில் முருகவேல் என்பவருக்குச் சொந்தமான பட்டாசு ஆலை உள்ளது. இங்கு 50-க்கும் மேற்பட்ட பட்டாசு தயாரிப்பு அறைகள் உள்ளன. இந்த ஆலையில் செவ்வாய்க்கிழமை 100-க்கும் மேற்பட்ட தொழிலாளர்கள் பணியில் ஈடுபட்டிருந்தனர். காலை 9.15 மணியளவில் ஓர் அறையில் பட்டாசுக்குத் தேவையான மருந்துக் கலவை தயாரிப்புப் பணியில் செவலூரைச் சேர்ந்த மாரியப்பன் (47), சிதம்பராபுரம் முத்துமுருகன் (43) ஆகியோர் ஈடுபட்டிருந்தனர்.