அடுத்தகட்ட பொருளாதார வளர்ச்சிக்கு அடித்தளம்

‘மத்திய அரசின் திறன்மிக்க நடவடிக்கைகளால், அடுத்த தலைமுறைக்கான பொருளாதார வளா்ச்சிக்கு அடித்தளமிடப்பட்டுள்ளது’ என்று குடியரசுத் தலைவர் திரெளபதி முர்மு தெரிவித்தார்.

மேலும், ‘பிரதமர் மோடி அரசு சமூக நீதிக்கு உயர் முன்னுரிமை அளிக்கிறது; பட்டியல் சமூகத்தினர் (எஸ்.சி.), பழங்குடியினர்கள் (எஸ்.டி.) நலனுக்காக முன்னோடியில்லாத திட்டங்கள் தொடங்கப்பட்டுள்ளன’ என்று குடியரசுத் தலைவர் திரெளபதி முர்மு தெரிவித்தார்.

நாட்டின் 78-வது சுதந்திர தினம் வியாழக்கிழமை (ஆக. 15) கொண்டாடப்படுகிறது. இந்நிலையில், குடியரசுத் தலைவர் திரௌபதி முர்மு நாட்டு மக்களுக்கு ஆற்றிய உரை:

நாட்டின் 78-ஆவது சுதந்திர தினத்தை கோலாகலமாக கொண்டாட தேசம் தயாராகி வருவது பெருமகிழ்ச்சி அளிக்கிறது. அதேநேரம், தேசப் பிரிவினையால் பாதிக்கப்பட்ட குடும்பங்களின் அளவில்லாத சோகத்தை நினைவுகூறுவதோடு, அக்குடும்பங்களுக்கு உறுதுணையாக நிற்க வேண்டும்.

அரசமைப்பின் 75-ஆவது ஆண்டை கொண்டாடும் இந்த வேளையில், நீதி, சமத்துவம், சுதந்திரம், சகோதரத்துவம் ஆகிய அரசமைப்பு கோட்பாடுகளில் உறுதியாக நின்று, உலக அரங்கில் தனக்கு உரிமையான இடத்தை எட்டும் பயணத்தில் இந்தியா உள்ளது.