முதல்வர் மருந்தகம், முன்னாள் ராணுவ வீரர்களுக்கு புதிய திட்டம்

குறைந்த விலையில் மருந்துகள் வழங்க முதல்வர் மருந்தகம்' எனும் திட்டம் செயல்படுத்தப்படும் என்று முதல்வர் மு.க. ஸ்டாலின் அறிவித்தார்.

மேலும், முன்னாள் ராணுவ வீரர்கள், அவர்களின் குடும்பங்களின் நலன் காக்க 'முதல்வரின் காக்கும் கரங்கள்' எனும் புதிய திட்டம் வகுக்கப்படும் என்றும் அவர் கூறினார்.

சுதந்திர தினத்தையொட்டி, சென்னை தலைமைச் செயலகத்தில் உள்ள கோட்டை கொத்தளத்தில் தேசியக் கொடியை ஏற்றி வைத்து முதல்வர் மு.க. ஸ்டாலின் வியாழக்கிழமை உரையாற்றினார். அவரது உரை விவரம்:

திமுக அரசு பொறுப்பேற்ற கடந்த 3 ஆண்டுகளில், 32,774 பேருக்கு நேரடிப் பணி நியமனங்கள் வழங்கப்பட்டுள்ளன. உள்ளாட்சி அமைப்புகள், அரசுத் துறைநிறுவனங்கள் போன்ற பல்வேறு அரசு அமைப்புகளில் 32,709 பேருக்கு பணிநியமனங்கள் அளிக்கப்பட்டன.

75,000 பணியிடங்கள் நிரப்பப்படும்: மேலும், 2026-ஜனவரி மாதத்துக்குள் 75,000-க்கும் மேற்பட்ட அரசுப் பணியிடங்கள் நிரப்பப்படும். அரசின் பல்வேறு தளங்களில் மேற்கொண்டு வரும் கள ஆய்வுகள் மற்றும் மக்களிடமிருந்து பெறப்பட்ட கருத்துகள் அடிப்படையில், திராவிட மாடல் அரசு சாரா சில அறிவிப்புகள் நடைமுறைக்கு வரவுள்ளன.