ரூ.7,616 கோடி அமெரிக்க முதலீடுகள் முழுமையாக நிறைவேறும்: சென்னை திரும்பிய முதல்வர் ஸ்டாலின் உறுதி

அமெரிக்க பயணம் மூலம் ஈர்க்கப்பட்ட ரூ.7,616 கோடி முதலீடுகள் அனைத்தும் முழுமையாக நிறைவேறும் என்று, சென்னை திரும்பிய முதல்வர் மு.க.ஸ்டாலின் உறுதிபட தெரிவித்தார்.

அதன் மூலம் 11 ஆயிரத்து 516 பேருக்கு வேலைவாய்ப்புகள் உருவாக்கப்படும் என்றும் அவர் கூறினார்.

சென்னை திரும்பினார்: 17 நாட்கள் அமெரிக்க சுற்றுப் பயணத்தை முடித்துக்கொண்டு மு.க.ஸ்டாலின் முதல்வர் சனிக்கிழமை காலை சென்னை திரும்பினார். விமான நிலையத்தில் செய்தியாளர்களுக்கு அவர் அளித்த பேட்டி:

எனது அமெரிக்க பயணத்தின் போது, அங்குள்ள தலைசிறந்த 25 நிறுவனங்களைச் சேர்ந்தவர்களுடன் சந்திப்பை நடத்தியுள்ளேன். இந்தச் சந்திப்புகளின் போது, 19 புரிந்துணர்வு ஒப்பந்தங்கள் கையொப்பமாகின. இதன் மூலம், ரூ.7 ஆயிரத்து 616 கோடி முதலீடு ஈர்க்கப்பட்டு 11 ஆயிரத்து 516 பேருக்கு வேலைவாய்ப்புகள் கிடைக்கும். இந்த முதலீடுகள் திருச்சி, மதுரை, கோவை, கிருஷ்ணகிரி, சென்னை, செங்கல்பட்டு, காஞ்சிபுரம் உள்ளிட்ட பல்வேறு மாவட்டங்களில் மேற்கொள்ளப்படவுள்ளன.

கூகுளுடன் ஒப்பந்தம்: கனவு திட்டமான 'நான் முதல்வன்' திட்டத்தின் வழியாக தமிழ்நாட்டு இளைஞர்களுக்கு திறன் மேம்பாட்டை உருவாக்கி, அதன் மூலம் வளமான எதிர்காலத்தை உருவாக்கும் வகையிலான ஒப்பந்தம் கூகுள் நிறுவனத்துடன் மேற்கொள்ளப்பட்டுள்ளது. இதுபோன்ற நடவடிக்கைகளால் தமிழ்நாட்டில் தொழில் தொடங்குவதற்கும், வணிகம் புரிவதற்கும் உகந்த சூழல் நிலவுவது மட்டுமல்லாமல், உலகெங்கிலும் இருக்கக்கூடிய முதலீட்டாளர்கள் முதலீடு மேற்கொள்ள விரும்பும் மாநிலமாகவும் தமிழ்நாடு திகழ்ந்து வருவது நிரூபிக்கப்பட்டுள்ளது.

ஃபோர்டு நிறுவன செயல்: அமெரிக்க பயணத்துக்கு மகுடம் வைத்தது போல, எங்கள் வேண்டுகோளை ஏற்று, சென்னை மறைமலைநகரில் உள்ள ஆலையில் மீண்டும் உற்பத்தியைத் தொடங்க ஃபோர்டு நிறுவனம் முன்வந்துள்ளது. முதலில் பேச்சுவார்த்தை நடத்திய போது, நிறுவனத்தின் உறுப்பினர்களுடன் பேசி விட்டு அதற்குப் பிறகு முடிவை அறிவிப்பதாக தெரிவித்தனர்.