மேற்கு வங்கம்: போராட்ட களத்தில் மருத்துவர்களுடன் முதல்வர் மம்தா சந்திப்பு

பெண் மருத்துவரின் பாலியல் கொலைக்கு நீதி கேட்டு தொடர் பணி புறக்கணிப்பில் ஈடுபட்டுள்ள இளம் மருத்துவர் களை மேற்கு வங்க முதல்வர் மம்தா பானர்ஜி பேராட்டகளத்தில் சனிக்கிழமை நேரில் சந்தித்து, பணிக்குத் திரும்புமாறு கேட்டுக்கொண்டார்.

இந்தச் சந்திப்புக்குப் பிறகு மீண்டும் பேச்சுவார்த்தை நடத்த மாநில அரசு-மருத்துவர்கள் முன்வந்தனர். எனினும், இருதரப்பும் தங்களின் நிலைப்பாட்டில் உறுதியாக இருப்பதால் சமாதான முயற்சி தோல்வியடைந்தது.

மேற்கு வங்க மாநிலம், கொல்கத்தாவில் உள்ள ஆர்.ஜி.கர் அரசு மருத்துவக் கல்லூரி மருத்துவமனையில் முதுநிலை பெண் பயிற்சி மருத்துவர் கடந்த மாதம் பாலியல் கொலை செய்யப்பட்டார்.

இதையொட்டி, அந்த மாநில அரசு மருத்துவமனைகளில் பணியாற்றும் இளம் மருத்துவர்கள் கடந்த ஒரு மாதத்துக்கும் மேலாக பணிப் புறக்கணிப்புப் போராட்டத்தில் ஈடுபட்டுள்ளனர்.

இச்சம்பவத்தை தாமாக முன் வந்து விசாரித்து வரும் உச்சநீதிமன்றம், 'மருத்துவர்கள் போராட்டத்தைக் கைவிட்டு செவ்வாய்க்கிழமைக்குள் (செப். 10) பணிக்குத் திரும்ப வேண்டும்' என்று உத்தரவிட்டது. ஆனால், அந்த உத்தரவை மீறி மாநில சுகாதாரத்துறை தலைமை அலுவலகம் முன்பு மருத்துவர்களின் போராட்டம் கடந்த 5 நாள்களாக தொடர்கிறது.

இந்த நிலையில், பேச்சுவார்த்தையை நேரலையில் ஒளிபரப்ப வேண்டும் என்ற நிபந்தனை ஏற்கப்படாததால் முதல்வர் மம்தா முன்னிலையில் மாநில அரசு-மருத்துவர் இடையே வியாழக்கிழமை நடைபெறவிருந்த பேச்சுவார்த்தை தோல்வியில் முடிந்தது.