விமானங்களில் நூதன முறையில் தங்கம் கடத்தும் ரகசிய திட்டம் அம்பலம்

வெளிநாடுகளில் இருந்து விமானத்தில் நூதன முறையில் தங்கம் கடத்தி வரும் கடத்தல்காரர்களின் ரகசிய திட்டம் அம்பலமாகியுள்ளதாக வருவாய் புலனாய்வுத்துறையினர் தகவல் தெரிவித்துள்ளனர்.

சென்னை விமானநிலையத்தில் உள்நாட்டு மற்றும் பன்னாட்டு விமானநிலையங்கள் செயல்பட்டு வருகின்றன. இந்த விமானநிலையங்கள் மூலம் தினமும் நூற்றுக்கணக்கான பயணிகள் மற்றும் சரக்கு விமானங்கள் கையாளப்பட்டு வருகின்றன. இந்நிலையில், சமீப காலமாக வெளிநாடுகளிலிருந்து சென்னைக்கு தங்கம் கடத்தி வரும் சம்பவம் அதிகரித்துள்ளதைத் தொடர்ந்து அதிகாரிகள் தங்கள் சோதனையையும், கெடுபிடியையும் அதிகப்படுத்தியுள்ளனர்.

இருப்பினும் ரகசிய தகவல்கள் அல்லது சந்தேகத்தின் அடிப்படையில் நடைபெறும் சோதனையில் மட்டுமே அவ்வப்போது கடத்தல் தங்கம் பறிமுதல் செய்யப்பட்டது. மீதமுள்ள அதிகப்படியான கடத்தல் தங்கம், கடத்தல்காரர்களால், எளிதாக விமான நிலையத்திலிருந்து வெளியே கொண்டு செல்ல முடிந்தது. குறிப்பிட்ட நபர்களிடம் கடத்தல் தங்கம் சரியான நேரத்தில் கொண்டு சேர்க்கப்பட்டு விடுகின்றன.