அமெரிக்க அதிபர் தேர்தல்: முந்துகிறார் டொனால்ட் டிரம்ப்!

அமெரிக்க அதிபர் தேர்தல் தொடர்பான கருத்துக்கணிப்பில் இந்திய வம்சாவளியைச் சேர்ந்த ஜனநாயகக் கட்சி வேட்பாளர் கமலா ஹாரிஸை குடியரசுக்கட்சி சார்பில் போட்டியிடும் முன்னாள் அதிபர் டொனால்ட் டிரம்ப் முந்திவருகிறார்.

இது குறித்து அரசியல் நோக்கர்கள் தெரிவிப்பதாவது:

வரும் நவம்பர் 5-ஆம் தேதி நடைபெறவிருக்கும் அதிபர் தேர்தலில் டிரம்ப்புக்கும் துணை அதிபர் கமலா ஹாரிஸுக்கும் இடையிலான போட்டி மிகக் கடுமையாக இருக்கும்; இருவரில் யார் வேண்டுமானாலும் வெற்றி பெறலாம் என்று கூறப்படுகிறது.

இருந்தாலும், நாள்கள் செல்லச் செல்ல தேர்தலில் டிரம்ப்பின் கை மேலோங்கி வருவது கருத்துக்கணிப்புகள் மூலம் தெரியவருகிறது.

தொடக்கத்தில் டிரம்ப்பை விட கமலா ஹாரிஸுக்கு அதிக விகிதத்தில் ஆதரவு தெரிவிக்கப்பட்டது. ஆனால், அந்த ஆதரவு நாளுக்கு நாள் குறைந்து வருகிறது. தொடக்கத்தில் 48 சதவீதமாக இருந்த கமலா ஹாரிஸுக்கான வாக்காளர் ஆதரவு, தற்போது 42 சதவீதமாகக் குறைந்துள்ளது. ஆனால் டிரம்ப்புக்கான ஆதரவோ சுமார் 46 சதவீதத்தில் நிலையாக உள்ளது.