கிழக்கு லடாக்கில் படை விலக்கலுக்குப் பின் பதற்றம் தணியும்

கிழக்கு லடாக்கில் இந்திய-சீன எல்லையில் பிரச்னைக்குரிய இரு பகுதிகளில் படை விலக்கல் நடைபெற்றுவரும் நிலையில், இந்த நடவடிக்கைக்குப் பின் பதற்றம் தணியும் என்று வெளியுறவுத் துறை அமைச்சர் எஸ்.ஜெய்சங்கர் நம்பிக்கை தெரிவித்தார்.

எல்லையில் ரோந்துப் பணி மற்றும் முழுமையான படை விலக்கல் தொடர்பாக இரு நாடுகளுக்கும் இடையே அண்மையில் முக்கிய ஒப்பந்தம் கையொப்பமானது. அதன்படி, கிழக்கு லடாக்கில் டெப்சாங், டெம்சோக் ஆகிய இடங்களில் பரஸ்பரம் படைகளை விலக்கிக்கொள்ளும் நடவடிக்கை சில தினங்களுக்கு முன் தொடங்கப்பட்டு நடைபெற்று வருகிறது. அக்டோபர் 29-ஆம் தேதிக்குள் இந்த நடவடிக்கை நிறைவடையும் என எதிர்பார்க்கப்படுகிறது.

இந்நிலையில், மும்பையில் உள்ள பாஜக அலுவலகத்தில் ஞாயிற்றுக்கிழமை செய்தியாளர்களுக்கு பேட்டியளித்த எஸ்.ஜெய்சங்கர், எல்லை விவகாரம் குறித்த கேள்விக்கு பதிலளித்து கூறியதாவது:

லடாக்கில் உள்ள டெப்சாங் மற்றும் டெம்சாக் பகுதிகளில் இந்தியாவும் சீனாவும் படை விலக்கல் நடவடிக்கைகளை தொடங்கியது அமைதி திரும்புவதற்கான முதல் நடவடிக்கையாகும்.

அடுத்ததாக எல்லையில் பதற்றம் தணிக்கப்படும். டெப்சாங் மற்றும் டெம்சாக் பகுதிகளில் ரோந்து மேற்கொள்ளவும் சீனாவுடன் கருத்தொற்றுமை எட்டப்பட்டுள்ளது.