70 வயதினருக்கு இலவச மருத்துவக் காப்பீடு

‘ஆயுஷ்மான் பாரத்’ இலவச மருத்துவக் காப்பீட்டுத் திட்டத்தின் கீழ், 70 மற்றும் அதற்கு மேற்பட்ட வயதுடைய மூத்த குடிமக்கள் அனைவருக்கும் ரூ.5 லட்சம் வரை மருத்துவக் காப்பீடு வழங்கும் திட்டத்தை பிரதமர் நரேந்திர மோடி செவ்வாய்க்கிழமை தொடங்கிவைத்தார்.

கடந்த மக்களவைத் தேர்தலையொட்டி, பாஜக அளித்த வாக்குறுதிகளில் இத்திட்டமும் ஒன்றாகும். இதுதவிர நாடு முழுவதும் சுகாதாரத் துறை சார்ந்த ரூ.12,850 கோடி மதிப்பிலான மேம்பாட்டுத் திட்டங்களையும் பிரதமர் தொடங்கிவைத்தார்.

நாட்டில் சுகாதார உள்கட்டமைப்பை வலுப்படுத்த மத்திய அரசு உயர் முன்னுரிமை அளிக்கிறது; தற்போது தொடங்கப்பட்டுள்ள திட்டங்கள், குடிமக்களுக்கு உயர் தரமான, அதேநேரம் செலவு குறைந்த சுகாதார வசதிகளை உறுதி செய்யும் என்று அவர் குறிப்பிட்டார்.

ஹிந்து மதத்தில் மருத்துவக் கடவுளான தன்வந்திரியின் பிறந்த தினம், ‘ஆயுர்வேத தினமாக கடந்த 2016-ஆம் ஆண்டில் இருந்து கொண்டாடப்பட்டு வருகிறது. 9-ஆவது ஆயுர்வேத தினம் செவ்வாய்க்கிழமை (அக். 29) கொண்டாடப்பட்டது. இதையொட்டி, தில்லியில் உள்ள அகில இந்திய ஆயுர்வேத நிறுவனத்தில் (ஏஐஐஏ) நடைபெற்ற நிகழ்ச்சியில் பங்கேற்ற பிரதமர் மோடி மேற்கண்ட திட்டங்களைத் தொடங்கி வைத்தார்.

வரலாற்றுச் சிறப்புமிக்க தீபாவளி: பின்னர் உரையாற்றிய அவர், ‘ராமஜென்மபூமியில் கட்டப்பட்ட ஸ்ரீராமரின் கோயிலில் ஆயிரக்கணக்கான தீபங்கள் ஒளிரவிருக்கின்றன. 14 ஆண்டுகளல்ல, 500 ஆண்டுகால காத்திருப்புக்குப் பின் கடவுள் ஸ்ரீராமர் தனது உறைவிடத்துக்குத் திரும்பியுள்ளார். எனவே, இந்தத் தீபாவளி வரலாற்றுச் சிறப்புமிக்கது’ என்றார்.