ஒளித் திருநாளில் புது சபதம் ஏற்போம்!

இன்று தீபாவளித் திருநாளாக மலர்ந்திருக்கிறது. இளங்காலை எழுந்து, எண்ணெய் தேய்த்து வெந்நீராடி, திருவிளக்கேற்றித் தெய்வம் தொழுது, புத்தாடை உடுத்தி, இனிப்புகளையும் வாழ்த்துகளையும் இதமாகப் பரிமாறிக் கொள்கிறோம். பட்டாசுகள் வெடித்தும், மத்தாப்புகள் கொளுத்தியும் குழந்தைகளோடு குதூகலிக்கிறோம். தீபாவளி காணுகிற தம்பதியரை வாழ்த்தியும், நம்மிலும் மூத்தோரை வணங்கியும், இளையோருடன் அன்பு பாராட்டியும் மகிழ்கிறோம்.

- எழுத்தாளர்

கங்கை நீராடல் தீபாவளித் திருநாளின் சிறப்பு அங்கம். இருக்கும் இடத்தில் கிடைக்கும் நீரைக் கங்கைத் தீர்த்தமாகக் கருதி நீராடி, எங்கும் நிறைந்த பரம்பொருளை, இஷ்ட தெய்வமாகவோ, குலதெய்வமாகவோ நினைந்து போற்றுவதில், தீபாவளி பொலிவு பெறுகிறது. நரகாசுரன் அழிவு, குறியீட்டுப் பொருள்.

புராணத் தொடர்புடைய இத்தகு பண்டிகைகளுக்கு, சடங்குகளும் சம்பிரதாயங்களும் அடிப்படையானவை. அவற்றுள் சமுதாய நலனும் இருப்பதில் தனித்துவமும், புனிதத்தன்மையும் இணைந்து கொள்கின்றன. ஹிந்துக்களின் பண்டிகையாகத் தீபாவளி இருந்தாலும், நடைமுறையில் எல்லார்க்கும் பொதுவான பண்டிகைகளுள் இதுவும் ஒன்றாகிவிடுகிறது.

நம் நேயர்களுக்கெல்லாம் கங்காஸ்நான பலன் கிடைத்தது பற்றி மகிழ்ச்சி அறிவிக்கின்றோம். சரீர சுத்தியுடன் மனோசுத்தியும் ஆத்மசுத்தியும் அவர்களுக்குப் பிராப்தியாக வேண்டுமென்று விரும்புகிறோம். தற்காலத்திலே இந்து ஜனங்களின் ஆத்மாவைப் பற்றியிருக்கும் அழுக்குகளாகிய பயம், அதைரியம் முதலியவையெல்லாம் அகன்றுபோய், அவர்கள் ஒளி மிகுந்த உள்ளத்தவர்களாகி விளங்க வேண்டுமென்பதே நமது கோரிக்கை என்று, 'இந்தியா' இதழில் (20.10.1906) மகாகவி பாரதி எழுதியதை மீளவும் நினைவுபடுத்திக் கொள்ளலாம்.

இந்திய மக்கள் அனைவருக்கும் உரியதாக, இப்பயனை மேலுயர்த்தி அதில் நரகாசுர ஒழிப்பை அந்நியத் துணிப் பகிஷ்கரிப்பாக அடையாளப்படுத்தி இருப்பார். அப்படி நமக்குள் அகத்தும் புறத்தும் இருக்கிற தீமைகள் அழிந்து நன்மை பெருக, மனத்தளவில் ஒருமை ஏற்படுத்தும் விழைவே, இந்தப் பண்டிகைக் கொண்டாட்டத்தின் நோக்கம்.

உணவு, உடை, கொண்டாட்டப் பொருள்கள் என்று தேவைக்கும் அப்பால், தீபாவளிக்கென்றே உற்பத்தி செய்யப்பெறுவன பல. நுகர்வின் பெருக்கமும், உற்பத்தியின் மிகுதிப்பாடும் போட்டி போட்டுக்கொண்டு வளர்கின்றன; அவற்றுக்கு, பண்டிகைகள் துணையாகின்றன. பணப் புழக்கத்திற்கும் உற்பத்திகளுக்கும் வழிவகுக்கும் தீபாவளி, கடன் வாங்குவதற்கும் திருப்பிச் செலுத்துவதற்கும் வழிவகை செய்கிறது.