எல்லையில் ஓர் அங்குலம்கூட விட்டுத் தரப்படாது - பிரதமர் உறுதி

எல்லையில் ஓர் அங்குல நிலத்தைக்கூட இந்தியா விட்டுத் தராது என்று பிரதமர் நரேந்திர மோடி உறுதிபடத் தெரிவித்தார்.

புஜ், நவ. 1: குஜராத்தின் கட்ச் மாவட்டத்தில் இந்தியா-பாகிஸ்தான் எல்லையில் உள்ள சர் கிரீக் பகுதியில் ராணுவத்தினருடன் பிரதமர் மோடி வியாழக்கிழமை தீபாவளி பண்டிகையைக் கொண்டாடினார். ராணுவ வீரர்களுக்கு இனிப்புகளை வழங்கி, பிரதமர் பேசியதாவது: சர் கிரீக் பகுதியைப் போர்க்களமாக மாற்றும் முயற்சிகள் முன்பு நடைபெற்றன. நீண்ட காலமாகவே, இப்பகுதி மீது நமது எதிரிகள் கண் வைத்துள்ளனர். ஆனால், நமது ராணுவத்தினர் பலமிக்கவர்கள் என்பதால் எந்தக் கவலையும் இல்லை. இது, எதிரிகளுக்கும் தெரியும்.

நாட்டைக் காப்பதில் நமது ராணுவத்தினர் வெளிப்படுத்தும் வலிமையால் எதிரிகளின் தீய திட்டங்களுக்கு முற்றுப்புள்ளி வைக்கப்பட்டு வருகிறது. இந்தியாவின் வலிமையை நமது ராணுவத்தினர் உலகுக்கு பறைசாற்றுகின்றனர்.