உறக்கம் ஓர் அருமருந்து!

உறக்கமின்மை என்பது அன்றாட வாழ்வில் சந்திக்கும் பிரச்னைகளில் முக்கியமான ஒன்றாகும். ஆழ்ந்த உறக்கம் உள்ளத்திற்கும், உடலுக்கும் தேவையான ஓய்வைத் தருகிறது. அதனால் நாம் உடலிலும், மனதிலும் புத்துணர்ச்சியைப் பெறுகிறோம்.

- முனைவர் என். பத்ரி

ஆழ்ந்த உறக்கத்தைப் பெறுவதில் உறங்கப் போவதற்கு முந்தைய நேரம் முக்கியமானதாகும். இதை நாம் உறங்குவதற்கு ஏற்ற சூழலை ஏற்படுத்தும் நேரமாக அமைத்துக் கொள்ள வேண்டும்.

குழந்தைகள் எந்தக் கவலையுமின்றி உறங்குவதைப் பார்க்கிறோம். ஆனால் வயது கூடக் கூட பல்வேறு பொறுப்புகள் நமக்கு வந்து சேருவதால், அதனுடன் கூட பல கவலைகளும் வாழ்வில் வந்து சேருகின்றன. அவை நமது உறக்கத்தின் நேரத்தையும், தரத்தையும் குறைத்து விடுகின்றன.

முதியவர்கள் பகல் நேரங்களில் எந்த வேலையும் செய்யாமல் இருப்பதால் உடல் களைப்படைவதில்லை. முதுமையில் பொதுவாக இரவில் உறக்கக்குறைபாடு ஏற்படுவதும் இயல்பானதே. ஆனால் அவர்களும் குறைந்தது 7 மணி நேரமாவது உறங்குவது நல்லது.

மருத்துவமனைகளில் சிகிச்சைக்காக அனுமதிக்கப்படும் நோயாளிகளை உறவினர்கள் பார்ப்பதற்கு ஒரு குறிப்பிட்ட நேரத்தை மட்டும் மருத்துவமனை நிர்வாகம் ஒதுக்குகிறது. பெரும்பாலும் அந்த நேரம் தவிர பிற நேரங்களில் நோயாளிகள் உறங்கிக் கொண்டிருப்பதை நம்மால் பார்க்க முடிகிறது. மருந்துடன் உறக்கமும் அவர்கள் நோய்களிலிருந்து நிவாரணம் பெறத் தேவைப்படுகிறது. பல சமயங்களில் நல்ல உறக்கமே உடலில் உள்ள பல நோய்களை விரட்டுகின்றது.